Бүгін ҚР Парламенті Мәжілісінің депутаттары, «Nur Otan» партиясы фракциясының мүшелері Ташқараев Ғани Әбдіғаниұлы және Ерман Мұхтар Тілдәбекұлы Шымкент қаласындағы іс-сапары барысында Жол-көлік колледжінің жұмысымен танысты.
Кездесуге «Nur Otan» партиясы Абай аудандық партия филиалы төрағасының бірінші орынбасары Е.Бертаев, Абай ауданы әкімінің орынбасары Ғ.Көшікбаев, Шымкент қалалық мәслихат депутаттары, «Nur Otan» партиясы фракция мүшелері М.Жолдыхожаев, Н.Балабиев қатысты.
Тәуелсіз Елдің болашағы да, тірегі де, ХХІ ғасырдың жастары жан-жақты кәсіби біліммен қаруланған, өздігінен қиындықтан шығуға жол табатын кез келген бәсекелестікке төтеп бере алатын маман тұлға болуы қажет деп санаған білім ордасында бүгінгі таңда 7 мамандық бойынша 1591 студент тәлім алуда.
Мемлекет басшысының техникалық бағыттағы мамандар даярлауға басымдық беру жөніндегі тапсырмасына сәйкес мұнда студенттердің алған теориялық білімін практикалық тұрғыдада шыңдап, сапалы маман ретінде қалыптасуы үшін колледждің техникалық базасы барынша заманауи қондырғылармен және приборлармен жабдықталған.
Аталған оқу ордасының жұмысымен толық танысып шыққан мәжіліс депутаттары колледж директоры Гүлзат Үкібайқызы басқарып отырған ұжымның жұмысына оң бағасын беріп, алдағы жұмыстарына сәттілік тіледі.