Шымкент қаласы прокурорының орынбасары Марат Ержан Маратұлының бастауымен Еңбекші ауданы полиция басқармасында үш буынды модель бойынша алқалы мәжіліс ұйымдастырылды.

Қылмыстық процестің үшбуынды моделі – азаматтардың құқықтары мен бостандықтарының кепілі. Үшбуынды модельге көшу – Президент тапсырмасы. Мемлекет басшысының межелі міндетін орындау мақсатында ағымдағы жылдың сәуір айынан бастап Павлодар облысы мен Шымкент қаласында адам өлтіру мен оған оқталу фактісі бойынша прокурордың шешімін қабылдау тетігі пилоттық сынақтан өтіп жатыр. Осыған орай Еңбекші аудан прокуратурасымен «дөңгелек үстел» мәжілісі өтті.

«Қылмыстық процестің үшбуынды моделі» деп аталған алқалы мәжілісте сотқа дейінгі өндірістің мәселелерін шешудің, ғылым мен практиканы интеграциялаудың, полиция академияларының ғылыми-білім беру қызметі аясындағы позицияларын жетілдіру бойынша жан-жақты әңгіме қозғалды. Ведомстволық білім беру жүйесін оңтайландырудың, тәжірибеге бағытталған оқу бағдарламалары және жаңа арнайы курстар мен пәндерді енгізудің өзекті мәселелері де жиында талқы таразысына салынды.

Мамандардың айтуынша полиция, прокуратура мен соттың алдына қойылған бұл жаңа талап жемісті нәтиже көрсетті.  Сондықтан ағымдағы жылдың маусымнан бастап,  бұл жүйе бүкіл республика бойынша жүзеге аса бастады. Тек әзірге пилоттық жоба ретінде.  Ал, құзырлы органдар жұмысы үшбуынды модельге негізінен 2022 жылдан бастап  толықтай көшетін болады.

Masa24.kz ақпарат