ШЫМКЕНТТЕ 5 МЛН ТЕҢГЕНІҢ ГРАНТЫНА 4 ЖОБА ТАҢДАЛДЫ

Шымкентте 5 млн теңгенің грантына небәрі 4 жоба таңдалып алынды. «Бизнестің жол картасы – 2025» мемлекеттік бағдарламасы аясында инновациялық жобаларды қаржыландыру үшін конкурс жарияланған болатын. Комиссия мүшелері бүгін жаңашыл идеяларды қолдау үшін ұйымдастырылған конкурсты қорытындылады.

Биыл кәсіпкерлік саласындағы тың бастамаларды қолдауға 150 млн теңге бөлінген. Грантқа ие болған қатысушылардың бірі үй жағдайында стационар ашу жобасын ұсынған болса, екеуі ауылшаруашылығына қатысты бастамаларға қаржы сұраған. Кәсіпорынды автоматтандыру бойынша ұсынылған тың идея да қолдау тапқан. Ал бір-бірін қайталайтын «көшірме» жобалар мен «бір қайнауы ішінде келген» ұсыныстарды қайтаруға мәжбүр болдық дейді комиссия мүшелері. Жуырда 5 млн теңгеге дейінгі гранттарға жобаларды қабылдау конкурсының екінші кезеңі ұйымдастырылатын болады. Салаға жауаптылар Шымкентте ауыл шаруашылығы өнімдерін қайта өңдеуге қатысты жобалардың грантты ұту мүмкіндігі зор екенін айтады.