Арман Абдуллаев Сарыағаш ауданы аумағына қарасты Тегісшілдік ауылдық округіндегі Мәдениет елді мекенінде бой көтеріп жатқан 75 орындық мәдениет үйі мен кітапхана ғимаратының құрылыс барысын бақылауда ұстап отыр. Аудан басшысы нысан басына арнайы барып, атқарылып жатқан жұмыстардың сапасын пысықтап, құрылыс қарқынымен танысты.
Тексеру барысында Арман Абдуллаев құрылыс жұмыстарының сапасына ерекше мән беру қажеттігін атап өтті. Ол жауапты сала мамандарына барлық құрылыс кезеңдерін бекітілген талаптар мен техникалық стандарттарға сай, жоғары деңгейде орындауды қатаң тапсырды. Сонымен қатар, нысанды уақытылы әрі сапалы пайдалануға беру – басты міндеттердің бірі екені ескертілді.
Аталған жоба «Мәдени объектілерді дамыту» бағдарламасы аясында жүзеге асырылуда. Бұл бағдарлама ауылдық елді мекендерде мәдени инфрақұрылымды дамытуға, тұрғындардың рухани және шығармашылық әлеуетін арттыруға бағытталған. Жаңа мәдениет үйі мен кітапхана іске қосылғаннан кейін ауыл тұрғындары үшін түрлі мәдени іс-шаралар өткізуге, жастардың бос уақытын тиімді ұйымдастыруға және кітап оқу мәдениетін дамытуға кең мүмкіндік туады.
Қазіргі таңда ғимараттың сыртқы абаттандыру жұмыстары жүргізілуде. Сонымен қатар, ішкі әрлеу, инженерлік желілерді тарту және аумақты көркейту жұмыстары кезең-кезеңімен атқарылуда. Құрылыс үдерісі бекітілген жоспарға сәйкес қарқынды түрде жалғасуда.
Нысанның мердігері – Строительная компания «Люкс сервис» ЖШС, ал тапсырыс беруші – ауданның құрылыс және сәулет, қала құрылысы бөлімі. Жауапты мамандардың айтуынша, барлық жұмыстар белгіленген кестеге сәйкес жүргізілуде және құрылыс сапасына тұрақты бақылау орнатылған.
Арман Абдуллаев мұндай әлеуметтік-мәдени нысандардың салынуы ауылдық аумақтардың дамуына серпін беретінін атап өтті. Оның айтуынша, мәдениет үйлері – тек ғимарат емес, ол ауылдың рухани орталығы және жас ұрпақтың тәрбиесіне ықпал ететін маңызды орын.
– Әрбір құрылыс сапалы әрі уақытылы аяқталуы тиіс. Бұл – тұрғындардың сенімі мен болашақ ұрпақтың игілігі үшін жасалып жатқан жұмыс, – деді аудан әкімі Арман Абдуллаев.
Жалпы, Сарыағаш ауданында мәдени-әлеуметтік инфрақұрылымды дамыту бағытындағы жұмыстар жүйелі түрде жалғасуда. Мәдениет елді мекеніндегі жаңа мәдениет үйі мен кітапхана құрылысы өңірдің рухани дамуына және ауыл өмірінің жандануына ықпал етпек.