«AMANAT» партиясы Шымкент қалалық филиалының ұйымдастыруымен кезекті экологиялық акция – «Таза бейсенбі» шарасы өтті. Бұл жолы тазалық жұмыстары Еңбекші ауданында, М.Сапарбаев және Владивостокская көшелерінің бойында жүргізілді.
Аталған шараға партияның қалалық және аудандық филиалдарының қызметкерлері, сондай-ақ белсенді азаматтар қатысты. Жалпы, 100-ге жуық адам экологиялық акцияға өз үлестерін қосты. Тазалық жұмыстары барысында елдімекен аумағындағы су арналары мен көше бойлары қоқыстан тазартылып, қураған ағаштар мен шөптер жиналды.
«Таза бейсенбі» шарасы Қазақстан Республикасының Президенті Қасым-Жомарт Тоқаевтың бастамасымен қолға алынған «Таза Қазақстан» жобасы аясында маусым айынан бері тұрақты түрде өткізіліп келеді. Бұл бастама экологиялық жағдайды жақсартып, қаланы таза ұстауға бағытталған. Осы уақыт аралығында Шымкент қаласынан 30 тоннадан астам қоқыс шығарылып, қала аумағының көркейуіне өз үлесін қосқан.
Осылайша, «Таза бейсенбі» шарасы арқылы қала тұрғындары мен қоғам белсенділері экологиялық мәселелерді шешуге атсалысып, Шымкенттің әсемдігін арттыруға бағытталған маңызды қадамдар жасалуда.