Жерасты өткелдеріндегі сауда қатарлары сүріледі. Шаһар басшысы Ғабит Сыздықбеков қоғамдық кеңес отырысында осылай деген еді. Аудан әкімдіктеріне тапсырма берілген соң, қаладағы бірқатар жерасты сауда орындары босатылған болатын. Ал кәсіпкерлер бұл жағдайға наразылығын білдіріп отыр. Толығырақ сюжеттен көріңіздер:
Анар Ермешова базарда сауда саласында кәсіп жасап жүргеніне 25-30 жылдың жүзі болған. Орталық қырғы базарының алдында орналасқан жер асты өткелінен табатын табысы жаман емес. Өткелден саудагерлерді босату керек дегенге қарсылық танытып, керісінше мүмкіндікті көбейтуді сұрайды.
Өткел тазалығын кәсіпкерлер өз мойындарына алған. Қанша таза ұстағанмен демалыс уақытында үйсіз-күйсіз адамдар келіп шашып, әжетін өтеп кететін көрінеді. Бұл әрекет жалғаса бергендіктен бейнебақылау камераларын және темірден қақпа қойыпты. Жаңбырлы күні өткел төбесінен лай су ағып, әбігерге салатын көрінеді. Цементпен сылап, тесіктерді өзіміз жамаймыз дейді саудагерлер. Тұтынушылардың айтуы бойынша өткелде саудагерлердің болғаны жақсы. Өткен адамдардың сауда жасауына ыңғайлы, тазалыққа жауапты деп пікірлерін білдірді.Айта кетейік, қазіргі таңда Шымкент қаласы бойынша 16 жерасты өткелі бар. Базар тұсында орналасқан барлық дерлік жерасты өткелдерінде кәсіпкерлердің сауда орындары орналасқан.
