Бүгін «Сайрам» тұрғын алабының халқымен елдегі саяси трансформация және референдум тақырыбы бойынша кездесу өтті.

Кездесуге ҚР Парламент Мәжілісінің депутаты Б.Оспанов, «Хабар» Агенттігі» АҚ Басқарма төрағасы, республикалық штабтың мүшесі Б.Уәли, Шымкент қаласы мәслихаты жанындағы Қоғамдық кеңестің төрағасы, мемлекет және қоғам қайраткері Ш.Мырзахметов, мәслихат депутаты Ж.Таңатарова, ОҚМПУ ректоры Г.Сүгірбаева, «Дустлик» ассоцациясының төрағасы И.Хошимжанов арнайы келіп, сөз сөйледі.

— «Мемлекет басшысы Қасым-Жомарт Кемелұлы Тоқаевтың өз Жолдауында жариялаған реформаларды халықтың таңдауы арқылы құқықтық тұрғыда бекіту үшін бізге референдум қажет. Егер олар қабылданса, еліміз өзінің саяси дамуының келесі деңгейіне өтеді. Реформа отандық құқықтық, партиялық жүйені, мемлекеттік билік бөлінісінің принципін өзгертеді. Ел Президенті осындай қадамдар арқылы шешім қабылдауға азаматтарды белсенді араласуға шақырып отыр. Енді аралас, яғни пропорционалды-мажоритарлы сайлау жүйесінде партияға мүше емес азаматтар да Парламентке депутаттыққа сайлана алады. Бұдан бөлек, сот шешіміне көңілі толмаған азаматтар Конституциялық сотқа тікелей арыздана алады», — деді Б.Уәли.

Өзгерістер халыққа қарапайым тілмен түсіндіріліп, басқосу сұрақ-жауап, терең талқылау форматында өтті. Өз кезегінде тұрғындар алдағы үлкен тарихи белестің мемлекет пен қоғам өмірінде айрықша орны бар екенін атап өтіп, бірқатар түйткілді мәселелерді ортаға салды.