Қазақтан шыққан белгілі кәсіпкер, меценат, «ZHERSU» инвестициялық-өндірістік корпорациясы бақылау кеңесінің төрағасы Бауыржан Оспанов шаруашылығын көрсетті. Ол ауыл шаруашылығы саласындағы бизнесі туралы сыр шертетін арнайы фильм түсіртіп жатыр екен.
Ол фильмде төрт түлік малды бағу бойынша әртүрлі тақырыпта әңгіме өрбітеді, деп хабарлайды Экспресс К.
Ауыл шаруашылығын насихаттайтын фильмнің қазір 3 сериясы Youtube-тегі Lepsi Product арнасына шығып үлгерді. Онда Бауыржан Оспанов қой, жылқы, сиырларын көрсетіп, оларды баптап, бағудың қыр-сырын айтып береді.
«Сиыр шаруашылығы — өте қиын сала. Бұрын сүт бағытында жұмыс істесек, қазір ет бағытына қарай ойыстық. Өйткені сүт бағыты ішкі нарықта әлі күнге дейін дұрыс жолға қойылмаған. Былайша айтқанда тиімді емес. Сондықтан біз ет саласына қарай өттік. Бірінші жыл Австралиядан 3 мың сиыр ұшақпен келді, жарты жылдан кейін тағы 3 мың құнажынды кемемен алдырдық. Барлығы 6 мың бас аналық болды. Қазір өсіп, көбейіп жатыр. Жылдағысын жылда сатып отырамыз. Қазір қалғаны сол 20 мың бастай бар», — дейді Бауыржан Оспанов.
Қазір оның осы 20 мың сиырымен қоса 50 мың қой, 10 мың жылқысы бар екен.
Сондай-ақ фильмде мецанаттан бөлек малшылар мен жұмысшылар да ауыл шаруашылығына қатысты өз пікірлерін ортаға салады.
