«Nur Otan» партиясы Шымкент қалалық филиалының кезектен тыс Саяси кеңесінің отырысы өтті. Саяси кеңес мәжілісін «NurOtan» партиясы Шымкент қалалық филиалының төрағасы, қала әкімі Мұрат Әйтенов төрағалық етіп, жүргізді.

Күн тәртібінде бір мәселе қаралып, партияның кезектен тыс ХХІ Съезіне Шымкент қаласынан қатысатын делегаттар анықталды. Коронавируске байланысты шектеу шаралары ескеріліп, бейнеконференция режимінде өткен отырысқа Шымкент қалалық мәслихат хатшысы Баһадыр Нарымбетов және партия филиалы төрағасының бірінші орынбасары Жанар Бектаева және партия филиалының Саяси кеңесі мүшелері қатысты.

Олар күн тәртібіне сәйкес ашық дауыспен кезектен тыс сьезге 14 делегатты сайлады. Делегат құрамына партияның Саяси кеңесі мүшелері, партия белсенділері мен жауапты қызметкерлер енді. «Біз партияның Съезіне қатысатын делегаттар тізімін бекіттік. Сіздермен бірлесе отырып, алдымызға қойып отырған асқаралы міндеттерін іске асыратынымызға кәміл сенемін, – деді Мұрат Әйтенов.

Айта кету керек, «Nur Otan» партиясы Саяси кеңесінің қаулысымен 2022 жылғы 28 қаңтарда партияның кезектен тыс XXI Съезін өткізу туралы шешім қабылданды. Қазақстанның барлық өңірлерінде кезектен тыс Саяси кеңес мәжілісі өтіп, делегаттар сайланатын болады.