Бейбіт заманда елдің тыныштығы үшін қаза тапқан барлық құқық қорғаушылар, сарбаздар, тәртіп сақшыларының отбасыларына, қапыда көз жұмған сәбилердің ата-аналарына қайғыра көңіл айтамын.
Қарапайым халықтың қалыпты өмір тіршілігіне, бизнес нысандарына, әлеуметтік және мемлекеттік мекемелердің үздіксіз жұмыс жасауына айрықша нұқсан келтірілген алмағайып уақытта «Nur Otan» партиясы Мемлекет басшысына қолдау көрсетіп, тапсырмалардың орындалуын жіті бақылауда ұстап отыр.
Елімізде қалыптасқан жағдайға байланысты ҚР Президенті Қасым-Жомарт Тоқаев барлық өңірлерде төтенше жағдай жариялады. Бүгінде, Мемлекет басшысының тапсырмасына сәйкес, әлеуметтік-экономикалық ахуалды тұрақтандыру үшін әлеуметтік маңызы бар азық-түлік тауарларының бағасы қадағалауға алынды. Сондай-ақ, мұнай өнімдерінің бағасы арзандап, коммуналдық төлемдерді қымбаттатпау, әлеуметтік маңызы бар өнімдердің экспортталмауы жөнінде шешім шығарды.

Халық талабы орындалды. Ендігі кезекте, алауыздық пен арандатушылардан сақ болу керек. Президент Қазастан халқын бейбітшілік пен татулыққа, өзара сыйластыққа, береке-бірлікке үндейтінін атап өтті. Имандылық пен парасаттылықты, жасампаздық пен мейірімді дәріптеп, жақсылыққа жол ашу арқылы біз жұмыла отырып, Қазақстан тарихындағы осы сын сағатты бірге еңсеру қажеттігін сөз етті.

« Бұдан шыңдалып шығамыз. Жуырда Қазақстанды саяси трансформациялау жөніндегі жаңа ұсыныстарымды жариялаймын. Мен дәйекті реформаларды бұрынғыдай жалғастыра беремін», деді Қасым –Жомарт Кемелұлы өз Үндеуінде.

Жалпы елімізге айтарлықтай залал келтірген жаппай тәртіп бұзушылық салдарын жеңіп шығу үшін тас-түйін ауызбіршілік пен темірдей тәртіп қажет екенін баса айтты.
Қазіргідей күрделі кезеңде бір-бірімізге қол ұшын беріп, барымызды бөлісіп, жұртымыздың аман-саулығын ойлап, жауапкершілік танытуымыз аса маңызды. Тілегіміз бір, ниетіміз ортақ болса, мақсатымызға жетеміз. Осы бір алмағайып шақта халықты сабырға шақырып, жол нұсқап, жөн сілтеп, жұбаныш лебіз айтып отырайық. Бірлігімізді бекемдеп, ынтымағымызды арттырайық, ағайын!