«Тәуелсіздік тарихында біз алғаш рет аса күрделі және қатерлі кезеңге тап болдық. Ел басына түскен осындай сынақты қайыспай біртұтас ел болып еңсере білдік. Енді біз мұндай жағдайға ешқашан жол бермеуіміз қажет.  Сондықтан, еліміз душар болған ауыр қасіреттің себептерін саралап, оның салдарына нақты баға беру – алдымызда тұрған өте маңызды міндет», — деді мемлекет басшысы  Қасым-Жомарт Тоқаев Парламент Мәжілісінің пленарлық отырысында.

Жиын барысында Президент жаңа Үкімет басшысы қызметіне Әлихан Смаиловты ұсынды. Мәжіліс депутаттары премьер министрлікке Әлихан Смаиловты лайықты кандидат деп тапты.

Президент жаңа Үкіметке мемлекеттің  саяси, әлеуметтік-экономикалық салаларында атқарылуы тиіс бірқатар тапсырмалар берді. Бұған қоса, ұлттық қауіпсіздік пен қорғанысты қамтамасыз ету жөніндегі өзекті мәселелерді шешу үшін нақты міндеттер жүктеді.

Қаза болған тәртіп сақшыларының, әскери қызметшілер мен қарапайым азаматтардың отбасына көмек көрсетуді ұсынды. Сондай-ақ,  қысқа мерзім ішінде қираған дүние-мүлікті қалпына келтіру керектігін,    қаржы жүйесі мен көлік саласының, азық-түлік жеткізу ісінің еш кедергісіз жұмыс істеуін қамтамасыз ету қажеттігін айтты.

Тауарлар мен көрсетілетін қызметтердің тапшылығын, бағаның негізсіз көтерілуін болдырмау маңыздылығын атап өтті. Кәсіпкерлікті дамыту үшін жүйелі жұмыс атқару өте маңыздылығын айта келе, кәсіп ашуды мақсат еткендерді қолдау үшін берілетін мемлекеттік грант көлемі 400 АЕК болатынын жеткізді.

Мемлекет басшысы сөзінің соңында қайғылы күндері бірлік танытқан қазақстандықтарға шынайы ризашылығын білдірді.

Мадина Ермаханбетова, 

Төлеби аудандық мәслихатының депутаты