МОБИЛЬДІ ТОПТАРДЫҢ ЖҰМЫСЫ КҮШЕЙТІЛДІ
Шымкентте мобильді топтардың жұмысы күшейтілді. Бүгінде қала аумағында санитарлық-эпидемиологиялық талаптардың сақталуына мониторинг жүргізетін 22 топ жұмыс атқаруда. Олар демалыс күндеріне қарамастан адамдар көп шоғырланатын жерлерде болып, карантин талаптарын сақтауға қатысты түсіндіру жұмыстарын жүргізді.
Шымкент қаласындағы эпидемиологиялық жағдайдың күрделене түсуіне байланысты мобильді топ күшейтілген күн тәртібінде жұмыс жасауда. Абай аудандық әкімдігі тарапынан 6 мобильді топ құрылған. Демалыс күндері аудан аумағында орналасқан «Самал» және «Тұлпар авто-бөлшек» сауда базарларын кезекті рет аудан әкімі Бұхарбай Пармановтың өзі аралап, карантин талаптарының сақталуы бойынша түсіндірме жұмыстарын жүргізді.
Абай ауданының аумағында жалпы 13 базар мен 3 мыңға жуық кәсіпкерлік нысан орналасқан.Оларға тексеру жұмыстарын жүргізген мобильдік топтар 1 сәуір мен 4 сәуір аралығында 31 кәсіпкерлік нысанға карантин талаптарының бұзылуы бойынша 2,7 мил. теңге көлемінде айыппұл салды.
Бұдан бөлек, шара барысында мобильді топ мүшелері адам көп жиналатын аялдамаларда, қоғамдық көліктердегі жолаушыларға түсіндірме жұмыстары жүргізіліп, бетперде таратты. Алайда, сақтыққа салғырт қарайтындардың қатары көбеймесе, кемімей отыр.
Сондай-ақ, мобильді топ аудан аумағындағы «Жабық», «Барыс» және Жібек жолы» базарларында ақпараттық-түсіндірме жұмыстарын жүргізді. Олардың араласыумен басынан бері 258 хаттама толтырылып, 30 мил теңгеге жуық айыппұл белгіленіпті.
