Бүгін аудандық мәдениет үйінде 1 маусым – Халықаралық балаларды қорғау күніне арналған «Бақытты отбасы – бақытты балалық шақ» атты мерекелік концерттік бағдарлама ұйымдастырылды.
Мерекелік шараға аудан тұрғындары, балалар мен олардың ата-аналары қатысып, көтеріңкі көңіл-күйде бас қосты.
Салтанатты жиында аудан әкімі Асқар Естібаев бүлдіршіндерді мерекемен құттықтап, балалардың қоғамдағы орны мен маңызына ерекше тоқталды.
– Бұл – мейірім мен қамқорлыққа, шаттық пен қуанышқа толы ерекше мереке. Себебі, бала – әр отбасының бақыты, еліміздің жарқын болашағы, Тәуелсіз Қазақстанның ертеңі. Сондықтан, өскелең ұрпақтың амандығы мен бақытты балалығы – баршамыз үшін аса маңызды, – деді аудан басшысы.
Шара барысында аудан әкімі балаларға арнайы сыйлықтар табыстап, мерекелік қуаныш сыйлады.
Концерттік бағдарламада ауданымыздың өнерпаз оқушылары ән шырқап, би билеп, өнерлерін ортаға салды. Жас өнерпаздардың жарқын өнері көрермендерге ерекше әсер қалдырып, мерекелік көңіл-күй сыйлады.
Бүгінде ауданда балалардың сапалы білім алып, спортпен шұғылдануына, шығармашылық қабілеттерін дамытуына барлық қажетті жағдайлар жасалуда.
Қазіргі таңда ауданда 18 жасқа дейінгі 37 470 бала бар. Оның ішінде 22 663 оқушы мектепте білім алса, 6 268 бүлдіршін мектепке дейінгі ұйымдармен қамтылған. Мектепке дейінгі жастағы балаларды балабақшамен қамту көрсеткіші бүгінде 100 пайызды құрайды.
Балалардың жазғы демалысын тиімді ұйымдастыру мақсатында биыл аудан бойынша 21 мыңға жуық мектеп жасындағы баланы жазғы сауықтыру лагерлерімен қамту жоспарланып отыр. Оның ішінде «Самал» сауықтыру лагерінде 2000 бала демалады.
Сонымен қатар, аудан көлеміндегі 61 мектеп жанындағы сауықтыру лагерінде екі ауысым бойынша 8 290 оқушыны қамту көзделген. Оның ішінде 5 041 оқушы бір мезгіл ыстық тамақпен, ал 3 249 оқушы тамақтанусыз демалыспен қамтылады.
Әлеуметтік қолдауды қажет ететін балаларға ерекше көңіл бөлінуде. Атап айтқанда, 1–4 сыныптар арасындағы 850 оқушы мектеп жанындағы лагерьлерде демалса, 5–10 сыныптардағы 1 250 оқушы қала сыртындағы сауықтыру лагерлеріне жіберіледі.