Ордабасы ауданында индустриялық-инновациялық бағыттағы ірі өндірістік жобаларды жүзеге асыру жұмыстары жүйелі түрде жалғасып келеді. Солардың бірі – «HUATING BIOTECHNOLOGY Co.,LTD» ЖШС-нің сүйектен май және желатин компоненттерін өндіруге бағытталған зауытының құрылысы. Аталған жоба өңірдің өнеркәсіптік әлеуетін арттырып қана қоймай, ауыл шаруашылығы қалдықтарын терең өңдеу арқылы экологиялық және экономикалық тиімділікті қатар қамтамасыз етуді көздейді.
Құны 9 млрд теңгені құрайтын бұл өндірістік кешен толық іске қосылған жағдайда жылына 5 мың тоннаға дейін дайын өнім шығаруға мүмкіндік береді. Сонымен қатар, зауыттың жұмыс істеуі нәтижесінде 30 жаңа тұрақты жұмыс орны ашылып, жергілікті тұрғындарды жұмыспен қамту деңгейі артады деп жоспарлануда. Бұл өз кезегінде аудан экономикасының әртараптандырылуына және инвестициялық тартымдылықтың артуына ықпал етеді.
Қазіргі таңда кәсіпорын аумағында құрылыс-монтаж жұмыстары қарқынды жүргізілуде. Нысанды толыққанды іске қосу үшін қажетті инфрақұрылым жүйелерін тарту жұмыстары да қатар атқарылып жатыр. Атап айтқанда, газ құбыры желісін жүргізу, электр қуатымен қамту және инженерлік инфрақұрылымды күшейту бағытында тиісті шаралар қолға алынған.
Аудан әкімі Азат Оралбаев құрылыс алаңына арнайы барып, жобаның жүзеге асу барысымен танысты. Жұмыс сапары барысында ол газбен қамту инфрақұрылымының орындалу деңгейіне ерекше назар аударып, жауапты сала мамандарына нақты тапсырмалар берді. Қазіргі таңда бастапқы кезеңде іске қосуға қажетті орта қысымды газ құбыры тартылып, тиісті техникалық шарттар толық алынған.
Ал зауытты толық өндірістік қуатта іске қосуға мүмкіндік беретін жоғары қысымды газ құбырының жобасы мемлекеттік сараптамаға жолданып, қаралу үстінде. Бұл кезең аяқталған соң өндірістік кешенді толық газ жүйесіне қосу жұмыстары басталатын болады.
Сонымен қатар кәсіпорын электр желісіне қосылып, қосымша қуат көздерін алу бойынша техникалық шаралар жүзеге асырылуда. Инженерлік желілердің тұрақтылығы мен қауіпсіздігін қамтамасыз ету мақсатында кешенді бақылау жүйесі енгізілуде.
Жоспарға сәйкес, 2026 жылдың маусым айында жоба жаңа өндірістік кезеңге өтеді деп күтілуде. Осы кезеңде газ құбырына толық қосу жұмыстары аяқталып, зауыттың іске қосу-баптау жұмыстары басталмақ. Аудан басшылығы мұндай ірі инвестициялық жобалардың сапалы әрі уақытылы жүзеге асырылуы өңірдің экономикалық дамуына серпін беретінін атап өтіп, барлық жұмыстардың тұрақты бақылауда болатынын жеткізді.