Ордабасы ауданы аумағында Мемлекет басшысының тапсырмасына сәйкес өндірісті дамыту, инвестиция тарту және жаңа жұмыс орындарын ашу бағытындағы жұмыстар жүйелі түрде жүзеге асырылуда. Осы бағыттағы негізгі жобалардың бірі – аудан орталығында орналасқан «Темірлан» өндірістік паркі болып отыр. Аталған өндірістік аймақ өңірдің экономикалық әлеуетін арттыруға және кәсіпкерлікті дамытуға арналған маңызды инфрақұрылымдық алаң ретінде қалыптасуда.
Жалпы аумағы 10,5 гектарды құрайтын өндірістік парк аумағында кәсіпкерлер үшін барлық қажетті инженерлік инфрақұрылым толық қамтамасыз етілген. Атап айтқанда, электр энергиясы мен ауыз су желілері тартылып, ішкі жол инфрақұрылымы ретке келтірілген және аумаққа асфальт төсеу жұмыстары аяқталған. Бұл өз кезегінде инвесторлар үшін қолайлы жағдай жасап, өндірістік жобаларды жылдам іске асыруға мүмкіндік беріп отыр.
Жобаның алғашқы кезеңінде жалпы көлемі 2400 шаршы метрді құрайтын 5 өндірістік ғимараттың құрылысы толық аяқталды. Әрбір өндірістік ангардың аумағы 480 шаршы метрді құрайды. Бұл нысандар шағын және орта бизнес субъектілеріне өндірісін бастауға немесе кеңейтуге дайын инфрақұрылымдық база ретінде ұсынылып отыр.
Қазіргі таңда өндірістік парк аумағында жалпы құны 2,3 млрд теңгені құрайтын бірқатар инвестициялық жобалар жүзеге асырылуда. Бұл жобалар толық іске қосылған жағдайда 63 жаңа жұмыс орнын ашу жоспарланған. Мұндай көрсеткіш аудан экономикасына қосымша серпін беріп, жергілікті тұрғындардың жұмыспен қамтылуына оң әсер етеді.
Атап айтқанда, өндірістік парк аумағында бірнеше бағыттағы жобалар жүзеге асуда. «ALMEN GROUP» ЖШС тәулігіне 5 тонна кір жуғыш ұнтақ өндіруді жолға қоймақ. «ҚАРАБАТЫР АГРО» ЖШС металл бұйымдарын, оның ішінде шеге мен сым өнімдерін шығаруды жоспарлап отыр. Ал «ASIA ENERGY Co» ЖШС күн панельдеріне арналған бөлшектер өндірісін іске асыруда. Сондай-ақ «Faced Company» ЖШС шыны өнімдерін шығару бағытында жұмыс жүргізсе, «Ақназар» жеке кәсіпкерлігі жартылай фабрикаттар, гидропоника өнімдері және құрама жем өндірісін дамытуды көздеп отыр.
Бүгін Азат Оралбаев өндірістік парк аумағына арнайы барып, кәсіпкерлермен кездесті. Кездесу барысында ол жүзеге асырылып жатқан жобалардың барысымен танысып, олардың инфрақұрылыммен қамтамасыз етілу деңгейін тексерді. Сонымен қатар кәсіпкерлердің ұсыныс-пікірлері тыңдалып, өндіріс процесін кедергісіз жүргізу үшін қажетті қолдау шаралары талқыланды.
Аудан әкімі тиісті сала басшыларына жобалардың сапалы әрі уақытылы іске асырылуын қамтамасыз етуді, инфрақұрылымдық мәселелерді жедел шешуді және инвестициялық жобалардың тұрақты бақылауда болуын тапсырды. Жергілікті билік өкілдерінің айтуынша, «Темірлан» өндірістік паркі алдағы уақытта Ордабасы ауданының индустриялық дамуына үлкен үлес қосатын негізгі орталықтардың біріне айналмақ.



