Бүгін аудан әкімі Мұхит Тұрысбеков және ауданға арнайы жұмыс сапарымен келген Түркістан облысының денсаулық сақтау басқармасының басшысы Асхан Байдуалиев «Созақ аудандық орталық ауруханасы» ғимаратында жүргізіліп жатқан күрделі жөндеу жұмыстарының барысымен танысты. Жұмыс сапары барысында денсаулық сақтау нысанының қазіргі жағдайы, құрылыс жұмыстарының сапасы және медициналық мекемені жаңғырту бағытындағы жоспарлар жан-жақты талқыланды.
Аудан басшысы мен басқарма жетекшісі алдымен аурухана аумағын аралап, жөндеу жұмыстары жүргізіліп жатқан бөлімдердің жай-күйімен танысты. Мамандар нысанда атқарылып жатқан жұмыстар туралы баяндап, құрылыс кестесіне сәйкес жұмыстардың кезең-кезеңімен жүзеге асырылып жатқанын жеткізді. Сонымен қатар инженерлік инфрақұрылымды жаңарту, ғимараттың беріктігін күшейту және заманауи талаптарға сәйкестендіру бағытындағы жұмыстардың маңыздылығы айтылды.
Жұмыс барысында мердігер мекеме өкілдерімен кездесіп, құрылыс сапасы, атқарылып жатқан жұмыстар мен алдағы жоспарлар сараланды. Нысандағы құрылыс жұмыстарының сапалы әрі мерзімінде аяқталуы бойынша жауапты сала басшыларына нақты тапсырмалар жүктелді. Әсіресе құрылыс материалдарының сапасы, қауіпсіздік талаптарының сақталуы және жұмыс қарқыны басты назарда екені атап өтілді.
Аудан әкімі Мұхит Сексенбайұлы ауданның медицина саласын дамыту, материалдық-техникалық базасын нығайту бағытындағы қосымша жоспарларымен бөлісті. Оның айтуынша, аудан тұрғындарына көрсетілетін медициналық қызмет сапасын арттыру – басты міндеттердің бірі. Осыған байланысты денсаулық сақтау мекемелерін кезең-кезеңімен жаңғырту, жаңа құрал-жабдықтармен қамтамасыз ету және мамандарға қолайлы жағдай жасау бағытында жүйелі жұмыстар жүргізілуде.
Сонымен қатар аудан басшысы бұл бойынша өндіріс орындарымен келіссөздер жүргізіліп жатқанын атап өтті. Болашақта демеушілер мен инвесторларды тарту арқылы медицина саласына қосымша қолдау көрсету жоспарланып отырғаны айтылды. Бұл өз кезегінде ауруханалардың техникалық мүмкіндігін арттырып, тұрғындарға сапалы әрі қолжетімді медициналық қызмет көрсетуге мүмкіндік береді.
Айта кетейік, жоба аясында медициналық мекеме ғимараты толық жаңғыртылып, заманауи талаптарға сай бейімделеді. Жөндеу жұмыстары аяқталғаннан кейін аурухана бөлімдері жаңа медициналық стандарттарға сәйкес жұмыс істейтін болады. Ғимараттың ішкі және сыртқы келбеті жаңартылып, инженерлік желілер толық ауыстырылады. Сонымен бірге науқастар мен медицина қызметкерлеріне қолайлы жағдай жасау үшін заманауи жабдықтар орнату көзделген.
Бас мердігер мекеме – «KazBuildCo» ЖШС. Аталған жоба «Қазатомөнеркәсіп» ұлттық атом компаниясының демеушілігі арқылы жүзеге асуда. Әлеуметтік маңызы бар мұндай жобалар өңірдегі денсаулық сақтау саласының дамуына оң серпін беріп, тұрғындардың сапалы медициналық көмек алуына ықпал етеді. Сонымен қатар ірі компаниялардың әлеуметтік жауапкершілік аясындағы қолдауы аудан инфрақұрылымын дамытуда маңызды рөл атқарып отыр.
Құрылыс-монтаж жұмыстары 2026 жылдың 11 сәуірінде басталған. Жобаны 2027 жылдың 31 қазанында аяқтау жоспарлануда. Қазіргі таңда нысанда құрылыс жұмыстары белгіленген жоспарға сәйкес жүргізіліп жатыр. Жауапты мамандар құрылыс қарқыны тұрақты бақылауда екенін және барлық жұмыстар талапқа сай орындалып жатқанын жеткізді.
Қазіргі таңда нысанның «В» блогында, яғни терапия бөлімінде демонтаж, іргетас пен қабырғаларды күшейту, арматура қаңқаларын орнату және құрылыс қалдықтарын шығару жұмыстары жүргізілуде. Сонымен қатар инженерлік жүйелерді жаңарту және ішкі әрлеу жұмыстарына дайындық шаралары қолға алынған. Нысанда 30-дан астам жұмысшы мен арнайы техникалар жұмылдырылған.
Медицина мекемесінің күрделі жөндеуден өтуі аудан тұрғындары үшін аса маңызды. Өйткені жаңартылған аурухана заманауи медициналық талаптарға сай қызмет көрсетіп, тұрғындардың сапалы ем алуына мүмкіндік береді. Әсіресе шалғай елді мекендерден келетін азаматтар үшін қолайлы жағдай жасау, медициналық қызметтің қолжетімділігін арттыру және дәрігерлердің тиімді жұмыс істеуіне жағдай қалыптастыру – жобаның басты мақсатының бірі.
Жалпы, Созақ ауданында денсаулық сақтау саласын дамыту бағытындағы жұмыстар жүйелі түрде жалғасып келеді. Медициналық нысандарды жаңғырту, заманауи құрал-жабдықтармен қамту және халыққа көрсетілетін қызмет сапасын арттыру бағытындағы бастамалар алдағы уақытта да кезең-кезеңімен жүзеге асырылатын болады.