Шымкент қаласы мәслихатының уақытша комиссиясы жылу беру маусымына дайындық шаралары аясында Еңбекші ауданындағы бірқатар инфрақұрылымдық нысандардың жұмысын тексерді. Қала мәслихатының төрағасы Бахадыр Нарымбетов пен энергетика және инфрақұрылымды дамыту басқармасының басшысы Рзабек Меңдіқұлов бастаған жұмыс тобы аудан аумағында жылу жүйелерін жаңғырту және жөндеу барысымен танысты.
Алдымен комиссия мүшелері аудан аумағында орналасқан ірі қазандықтардың біріне барып, жаңғырту жұмыстарын қарады. Бұл қазандық Еңбекші ауданының көпқабатты үйлері мен әлеуметтік нысандарын жылумен қамтамасыз етуде маңызды рөл атқарады. Мердігер ұйым өкілдерінің айтуынша, қазандықтың жаңартылған жабдықтары пайдалану шығындарын азайтып қана қоймай, тұтынушыларға жеткізілетін жылу сапасын да арттырады. Сонымен қатар, қазандықтың аудандағы тұрғын үйлер мен мектептерге, балабақшаларға жақын орналасуы жылыту режимін тез реттеуге мүмкіндік береді.
Жылу маусымына дайындық жұмыстары тек орталық қазандықтармен шектелмейді. Еңбекші ауданында бірнеше көшелер мен шағынаудандарда жылу желілері ауыстырылып жатыр. Ескі құбырлар заманауи, жылу оқшаулауы жоғары жаңа құбырларға алмастырылуда. Бұл жылу шығынын азайтып, қыс мезгілінде тұрғындардың пәтерлерінде қажетті температураны тұрақты ұстап тұруға мүмкіндік береді.
Сонымен қатар, бірқатар көпқабатты үйлердің жылу жүйелері толық жаңартылуда. Бұрынғы жүйелердің тозуына байланысты жиі ақаулар туындап, тұрғындарға қолайсыздық келтіріп келген. Енді жаңа жабдықтар орнатылған соң, жүйенің сенімділігі артып, техникалық қызмет көрсету шығындары азаяды деп күтілуде.
Жұмыс тобы аудан аумағындағы денсаулық сақтау нысандарын да назардан тыс қалдырмады. Жұқпалы аурулар ауруханасында күрделі жөндеу жұмыстары қарқынды жүріп жатыр. Мұнда жылу жүйесі толық ауыстырылып, ғимараттың жылу оқшаулау деңгейі жақсартылады. Бұл медициналық мекеменің қыс айларында науқастар үшін қолайлы жағдай жасауына мүмкіндік береді.
Комиссия төрағасы Бахадыр Нарымбетов мердігер ұйымдарға құрылыс және жөндеу жұмыстарын сапалы әрі белгіленген мерзімде аяқтау керектігін қатаң ескертті. Ол сондай-ақ, жылу маусымының басталуына дейін барлық нысандардың толық дайын болуын қамтамасыз ету үшін қосымша тексерістер жүргізілетінін айтты.
Энергетика және инфрақұрылымды дамыту басқармасының мәліметінше, Еңбекші ауданындағы барлық дайындық шаралары белгіленген кесте бойынша жүріп жатыр. Қажетті жабдықтар мен материалдар жеткізілген, ал негізгі жұмыстардың көпшілігі қыркүйек айының соңына дейін аяқталмақ.
Жалпы, Еңбекші ауданындағы бұл ауқымды жұмыстардың басты мақсаты — тұрғындарды үздіксіз және сапалы жылумен қамтамасыз ету, инженерлік инфрақұрылымды жаңғырту және энергия тиімділігін арттыру.
