АЗАТ ШАҒЫНАУДАНЫНДА АРАЛАУ ЖҰМЫСТАРЫ ЖҮРГІЗІЛДІ
Шымкент қаласы Еңбекші ауданының әкімі Д. Есілбек және Еңбекші аудандық полиция басқармасының басшысы Ж. Бейсенов, жауапты сала мамандарымен бірге Азат шағынауданының инфрақұрылымдық жағдайымен танысу мақсатында аралау жұмыстарын жүргізді, деп хабарлайды «MASA24.KZ» ақпарат агенттігі.
Аралау барысында тұрғындар тарапынан көтерілген бірқатар өзекті мәселелер назарға алынды. Атап айтқанда, аяқжол салу, көшелерді кеңейту, қоғамдық көлік аялдамаларының орнын реттеу, көшелерді асфальттау, балалар ойын және спорт алаңшаларының жай-күйін тексеру, түнгі жарықшамдардың жұмысы сынды тұрғындардың өмір сапасына тікелей әсер ететін бағыттар бойынша зерделеу жүргізілді.
Әсіресе, тұрғындардың қауіпсіз қозғалысын қамтамасыз ету үшін аяқжол салу және көшені кеңейту жұмыстарының маңыздылығы ерекше атап өтілді. Сонымен бірге қоғамдық көліктің қолайлылығын арттыру үшін аялдамалардың қажетті орындарын белгілеу және олардың жай-күйін жақсарту тапсырылды.
Көшелердің асфальтталуы, жол сапасын жақсарту жұмыстарының уақтылы әрі сапалы жүргізілуі де басты назарда болды. Балалар ойын алаңшалары мен спорт алаңдарының қазіргі жағдайы тексеріліп, қауіпсіздік талаптарына сәйкестігін қамтамасыз ету бойынша ұсыныстар берілді. Түнгі жарықшамдардың жұмысын жүйелеу, жарықтандыруды күшейту – тұрғындардың қауіпсіздігі үшін маңызды шаралардың бірі ретінде қарастырылды.
Аудан әкімі Д. Есілбек аралау барысында анықталған кемшіліктерді жою бойынша жауапты мамандарға нақты тапсырмалар жүктеді. Әрбір сала жетекшісіне жұмыстардың сапалы орындалуын қатаң бақылауға алу тапсырылды.
Азат шағынауданындағы инфрақұрылымды жақсарту бойынша жұмыстар алдағы уақытта да жалғасады. Аудан әкімдігі тұрғындардың ұсыныс-пікірлерін ескере отырып, қолайлы, қауіпсіз әрі заманауи қала ортасын қалыптастыруды басты мақсат етіп отыр.
