Еңбекші ауданы әкімі аппаратының ұйымдастыруымен Бердіқожа батыр көшесінің бойында санитарлық тазалау жұмыстары өткізілді. Сенбілікке Еңбекші ауданы әкімі аппаратының қызметкерлері, «Еңбекші» мемлекеттік коммуналдық мекемесі мен «Группа Интеко» ЖШС өкілдері қатысты.
Іс-шара барысында көшенің санитарлық жағдайы жақсартылып, жол жиегін сыпыру, шөп шабу, ағаш түптерін ашу, қураған бұтақтарды кесу және ретке келтіру жұмыстары атқарылды.
Жалпы, Еңбекші ауданында инженерлік инфрақұрылымды дамыту, тұрғын үй-коммуналдық шаруашылығын жетілдіру, көше-жол инфрақұрылымын жақсарту, сондай-ақ «Таза Қазақстан» ұлттық жобасын іске асыру бағытында кешенді жұмыстар тұрақты жүргізілуде.
Абаттандыру жұмыстары аясында көпқабатты тұрғын үйлердің аулаларын жаңғырту, балалар ойын алаңдарын орнату, спорттық нысандар мен демалыс орындарын абаттандыру бойынша жүйелі шаралар жүзеге асырылуда. Сонымен қатар, жыл сайын аудан аумағында жасыл желектер отырғызылып, саябақтар мен скверлерді көріктендіру жұмыстары жүргізіледі. Ағаш түптерін күтіп-баптау, қураған бұтақтарды кесу, гүлзарлар қалыптастыру арқылы экологиялық тепе-теңдік пен қала келбетін жақсартуға ерекше назар аударылуда.

Тұрғындар арасында тазалық мәдениетін қалыптастыру, қоршаған ортаға ұқыпты қарау және экологиялық сананы арттыру мақсатында түрлі ақпараттық-түсіндіру жұмыстары, сенбіліктер мен экологиялық акциялар өткізіліп келеді. Әлеуметтік желілер мен ресми ақпараттық ресурстарда экология мен санитарлық тазалық мәселелерін көтеретін бейнематериалдар мен түсіндірме контенттер тұрақты жариялануда.
Аудан әкімдігі тұрғындармен кері байланыс орнатып, олардың ұсыныс-пікірлері негізінде қоғамдық кеңістіктерді абаттандыру, санитарлық тазалықты жақсарту бойынша нақты шаралар қабылдап келеді. Бұл бағыттағы жұмыстар алдағы уақытта да жалғасып, Еңбекші ауданының экологиялық жағдайын жақсартуға, қоршаған ортаны қорғауға және тұрғындардың өмір сүру сапасын арттыруға ықпал ететін болады.