Түркістан қаласының әкімі Р.Аюпов шаһардағы білім саласында 40 жыл тер төккен үздік ұстазды қабылдады. Кездесуде Қ.Сәтбаев атындағы №12 жалпы орта мектебін он жылға жуық басқарған Жанатсұлу Сагдуллаеваның ерен еңбегіне алғысын білдірді. Сонымен қатар Қазақстан Республикасының Президенті Қасым-Жомарт Тоқаевтың және әкім атынан тағайындалған алғыс хаттарды табыстады.

Әңгімелесу барысында сыннан өткен білікті мамандардың қашанда керек екенін, кейінгі жас ұстаздардың үлгі алып, көп үйрену қажеттілігі тілге тиек етілді. Осы мақсатта зейнетке шыққан ұстаздар қауымының басын біріктіре отырып, келешек буынмен тәжірибе алмасуды қамтамасыз ететін қоғамдық бірлестік құрылатыны сөз болды.

Еңбегі еленіп тиесілі марапат тұғырынан көрінген Жанатсұлу апай ұстаздық жолдың даңқ пен мәртебе екенін, мақтан етерлік қаншама үздік шәкірттері болғанын мақтаныш сезіммен жеткізді. Ұзақ жылғы ұстаздық шеберханасындағы үздік тәжірибелерін талмай үйрететінін айта келіп, лайықты құрмет көрсетілгені үшін рахметін жеткізді.

Айта кетейік, Жанатсұлу Мырзахметқызы Шымкент Педагогикалық институтының түлегі. Еңбек жолын 1978 жылы Некрасов атындағы мектепте кітапханашы болып бастаған. Одан кейінгі әр жылдарда М.Жұмабаев атындағы №15 орта мектебінде, Ж.Еділбаев атындағы №11 мектеп-гимназиясында орыс тілі мен әдебиетінің мұғалімі, директордың тәрбие ісі жөніндегі орынбасары қызметтерін атқарған. Ал 2011 жылы Қ.Сәтбаев атындағы №12 жалпы орта мектебіне директор болып тағайындалғаннан қазірге дейін осы бір қызметтің үдесінен шығып келді. Мың машақатын да көрді, бақытын да сезінді. Міне бүгін ұстаздық жолындағы жарты ғасырға жуық жеңісті еңбегі жемісін беріп отыр.

Үмітбек БАҒДАТ.