Бүгін «Қазақстан Республикасы Төтенше жағдайлар министрлігі Мәлік Ғабдуллин атындағы Азаматтық қорғау академиясы» мемлекеттік мекемесінің Шымкент қаласы оқу орталығы қызметкерлері мен тыңдаушылар арасында сыбайлас жемқорлық фактілеріне жол бермеу туралы және патриоттық сезімді ояту мақсатында жиын өтті.
Аталған жиынға «AMANAT» партиясы Шымкент қалалық филиалы жанындағы Сыбайлас жемқорлыққа қарсы кеңес төрағасы Ержаппар Берген Ержаппарұлы арнайы қатысып, баяндама оқыды.
Ол қызметкерлерді сыбайлас жемқорлық фактілеріне бүгіннен бастап жол бермеуге шақырды.
– Қазірден бастап сіздердің саналарыңызда сыбайлас жемқорлыққа мүлдем төзбеушілік, адалдық, парасаттылық қағидаттары қалыптасу керек. Жемқорлықтың алдын алу бағытында көптеген жұмыстар атқарылуда. Соның бірі – түсіндіру жұмыстары. Егер параның немесе сыйлықтың құны 2 АЕК көлемінен жоғары болса, бұл жерде қылмыстық жауапкершілік қарастырылған. Егер аталған көрсеткіштен төмен болса, әкімшілік жауапкершілікке тартылады. Пара алған тұлға ғана емес, оны берген адам да жауапкершіліктен жалтара алмайды, – деді Берген Ержаппарұлы.
Сонымен қатар қала аумағында орын алған сыбайлас жемқорлық қылмысына қатысты статистикалық деректерден де хабардар етіп, суицид және діни экстремизм мен терроризм тақырыбын да тілге тиек етті.