Шілде айынан басталған OPEN AIR форматындағы “Шымқала кештері” концерттік шарасы Шымкенттің әр түрлі мәдениет үйлерінде өтуде. Оның бірі – Жаңаталап тұрғын алабында өткен өнер кеші болды. Бұл шарада “Шымкент концерт” ұжымының әртістері көрермендерге көңілді әрі әсерлі өнер көрсетті.
Мегаполистің мәдени өмірін жандандыру мақсатында ұйымдастырылған жобаның басты мақсаты – қала аудандарын қамтып, әр сенбі сайын тұрғындарға ерекше демалыс сыйлау. Бұл кештер халықтың мәдениетке деген қызығушылығын арттырып, бос уақытты пайдалы әрі қызықты өткізуге мүмкіндік береді.
“Шымқала кештері” жобасы заманауи өнер, музыка, спорт және шығармашылықтың тоғысқан алаңы ретінде белгілі. Ол сонымен қатар тұрғындардың әлеуметтік байланыстарын нығайтып, өзара араласуын арттыруды көздейді. Бұл жоба аясында қаладағы шалғай аудандарда “Шымкент — Цирк”, “Шымкент концерт”, “Шымкент қалалық әзіл-ысқақ және сатира театры”, “Шымкент қалалық орыс драма театры”, “Шымкент қалалық қуыршақ театры” сияқты ұжымдар өнер көрсетуде.