Шымкент қаласындағы А.Асқаров атындағы мемлекеттік дендрологиялық саябақ аумағында демеушілердің қолдауымен көптеген жаңа жобалар іске асырылып, абаттандыру жұмыстары қарқынды жүргізіліп келеді.
Қалалық әуежайдың демеушілігімен саябақтың кіреберісіндегі А.Байтұрсынов көшесі қақпасының жанында жаңа спорт алаңшасы салынды. Заманауи үлгідегі қажет құрал-жабдықтармен жабдықталған спорт алаңы белсенді өмір салтын қолдайтындар үшін қолайлы орынға айналып отыр.
Соңғы үш ай ішінде саябақта ескі күзет үйлерінің орнына төрт жаңа заманауи күзет үйі орнатылып, бос жатқан аумақтар көгалдандырылды. Жалпы 400 түп кәдімгі қарағай ағашы отырғызылып, аумақ автоматты суғару жүйесімен жабдықталды.
Сонымен қатар, саябақтың «Қошқар ата» учаскесінде Оңтүстік Жарық Транзит ЖШС-нің демеушілігімен жарықтандыру жұмыстары жүргізілді. Мұнда 60 жарықшам мен 300 метр кабель жаңартылды, бұл келушілердің қауіпсіздігі мен жайлылығын арттыруға бағытталған.
Демеушілердің қолдауымен дендросаябақ аумағы айтарлықтай жаңарып, халықтың тынығуына қолайлы ортаға айналып келеді.