53 жастағы ер адам теуіп, ұрып қорлаған келіншек пен олардың 3 айлық сәбиі ауруханада жатыр. Дәрігерлердің айтуынша, баланың жағдайы ауыр, жан сақтау бөлімінде.

Баланың өзінде туа бітті гидроцефалия диагнозының болуы ем-домды қиындатып отыр. «Сәбиде бас миының контузиясы, сол жақ қабырға асты сүйегінің сызықты сынуы, сол жақ жарты шар миының қабырғалық бөлігінің эпидуральды пластинкалы гематомасы, сондай-ақ баланың денесінде мойын, арқа және жамбас аймағында жұмсақ тіндердің көгерулері бар», — деп хабарлады ведомство өкілдері.

Естеріңізге салайық, Шымкент қаласының 53 жастағы тұрғыны әйелін ұрып-соғып, пышақпен қорқытып, кейін үш айлық қызын тепкілеген. Қыз ауруханаға түсіп, жансақтау бөліміне жатқызылды. Ол кезде оның миына қан құйылған болатын. Аталған факті бойынша қылмыстық іс қозғалды. Күдікті уақытша ұстау изоляторында.