Биыл Ә. Қуатбеков атындағы ХДУ-не 25 жыл!  Еліміздегі ең алғашқы жекеменшік оқу ордасының бірі де бірегейі биыл 20-шы түлектерін ұшырды.  5 мыңнан астам студент қолына диплом алып, үлкен өмірге жолдама алды. Олардың 200-і — үздік диплом иегерлері. Білім ордасының топжарған түлектеріне қызыл дипломдар салтанатты түрде табыс етілді.

Бұлар — еліміздің болашағын жарқын ететін бір-бір шамшырақ. Жүректері алып-ұшып, көздерінде от ойнайды. Көңілде  сенім мен үміт бар. Асылтас Нұрпейісова үшін бүгінгі кештің мән-маңызы ерек. Оқуын үздік бітірген жас маман енді білімін магистратурада жалғастырмақ.

4 жыл бойы ұзтаздарының білім нәрімен сусындаған түлектерге университет басшысы Рабиға Әбдімұсақызы ақжарма тілегін ақтарды.

Қуатбеков университетінде 15 мыңға жуық студент бар. 130 шетел азаматы тәлім алып жүр. Талапкер таңдауының дәл осы оқу ордасына түсуі – жай емес. Өйткені білім ұясы институционалды мамандандырылған, халықаралық акредитациядан өткен.

Іргелі оқу ордасының  құрамында екі колледж, екі мектеп және екі балабақша бар. Яғни, Халықтар достығын дәріптеп жүрген оқу ұясы жас ұрпақты тал бесіктен бастап, тәрбиелейді. Салтанатты шарада өнерпаздар әннен шашу шашып,кештің көркін қыздырды.