Иордания астанасы Амманда өткен бокстан азия чемпионатының алтын жүлдегері келестік Санжар Ташкенбай туған жері, Келес ауданының Ақтөбе ауылдық округіне келді. Чемпионмен Келес ауданының әкімі Ақментай Есбаев кездесіп, өз ізгі тілектерін арнады.

— Ауданымыздан өзің секілді жастардың шығып, ел намысын әлемдік ареналарда абыройлы қорғауы бүкіл келестіктер үшін үлкен мақтаныш. Артыңнан еріп келе жатқан жасөспірімдер үшін сен нағыз батыр атандың. Алдағы уақытта Олимп шыңын бағындырып, еліміздің атын төрткүл дүниеге танытуыңа тілектеспіз, — деді аудан басшысы Ақментай Үсенұлы.

Аудан әкімі Ақтөбе ауылдық округіндегі Ғ.Мұратбаев елді мекеніндегі спортшының жанұясына барып, спортшының әжесі Разия Шалдыбаеваға ел мақтанатындай ұл тәрбиелегеніне алғысын айтып, иығына ақ жаулық жапты.

Чемпионның құрметіне ауылдастары қазақтың ұлттық спорты саналмыш Көкпар беріп, Санжарға ат мінгізді. Әлем және Азия чемпионы өз кезегінде елеп, құрмет көрсеткен барша жерлестеріне өз ризашылығын білдіріп, алдағы спорттық сайыстарда жеңістің тұғырынан көрінуге бар мүмкіндігін саларын айтты.

(с) Келес ауданы әкімдігінің баспасөз қызметі