Түркістан қаласына қарасты Ғани Мұратбаев атындағы №5 жалпы орта мектебінде «Оқуға құштар мектеп» жобасы аясында біршама игі істер атқарылуда. Соның ішінде жас буынның білімділік сауаттылығын арттыру – бірінші орында тұр. «Кітап – білім бұлағы» дейтін болсақ, қазір кітапқұмар жастар азайып кетті. Оған басты себеп – кітапханалардың заман ағымынан кенжелеп қалуы. Осы олқылықтың орнын толтырып, оқырманды кітапханаға қайта тарту мақсатында «Coworking» орталығы ашылды.

Басты мақсат – кітапханаға оқырманды, әсіресе жастарды көбірек тарту. Мұндай бастама – рухани азықтан алыстап бара жатқан өскелең ұрпақты кітап оқуға баулудың таптырмас жолы. Яғни, жастарға ұлттық салт-дәстүрімізді, әдет-ғұрпымызды таныту. Көркем әдебиетті оқыту арқылы құндылықтарымызды, тарихымызды дәріптеу. Еліміздің сауатты азаматтарының қатарын арттыру. Әсіресе, бұл мекен компьютерлік ойындарға тәуелді жастардың назарын кітапқа аударуға зор үлес қосады.

Кітапханада балалар тек кітап оқумен ғана шектелмей сүйікті істерімен яғни тоғызқұмалақ, шахмат, дойбы ойындарын ойнап, ән тыңдап, әртүрлі шаралар өткізіп әлеуметтік желіден қажетті ақпараттарын ала алады. Орталықтың жұмысы туралы кітапхана меңгерушісі Калимбетова Динара түсіндіріп, қалай жұмыс жасайтынын таныстырып өтті.

«Жаңаша безендіріліп, өзгеше жабдықталған орталық оқушылардың тұрақты ортасына айналарына сенім мол!»,- дейді мектеп ұжымы.