Мақтаарал ауданының орталығы Мырзакент кентінде орталық саябақтың құрылысы басталады. Жақында ғана мемлекеттік сатып алу жұмыстары аяқталып, құрылыстың бас мердігері анықталды.
Аудан әкімі Бақыт Асанов мердігер компанияның өкілдерімен арнайы кездесіп, құрылысы басталғалы тұрған орталық саябақтың жобасын талқылады. Сондай-ақ нысанның ішін аралап, жобаны сәтті орындап, жұмысты өз мерзімінде сапалы аяқтау керектігін тапсырды.
Орталық саябақтың сметалық құны — 633 миллион теңгені, конкурстық құны — 596 миллион теңгені құрайды. Мердігер компания «ГрадСтройСервис» ЖШС-і құрылыс нысанын 2023 жылдың соңына дейін аяқтауды жоспарлап отыр.
Жалпы құрылыстың тапсырыс берушісі — ауданның сәулет, қала құрылысы және құрылыс бөлімі. Ал жобалаушы мекеме — «Сантех-Строй Проект» ЖШС болса, техникалық қадағалаушы мекеме — «Нұр&М Құрылыс» ЖШС.
Айта кетейік, аудан орталығы статусын алғалы 4 жыл ішінде Мырзакент кенті көркейе түсті.
Түркістан облысы әкімінің баспасөз қызметі
