Ғасыр жасаған кейуананы арнайы құттықтау үшін аудан әкімінің орынбасары Алтын Ешанқұлова, ауданның жұмыспен қамту және әлеуметтік бағдарламалар бөлімінің басшысы Мырза Мұса, аудандық мәслихаттың депутаты Тимур Адамбеков бастаған топ Еңбекші ауылдық округіне қарасты Шұғыла ауылына арнайы барды.

5 ұл және 5 қызынан 100-ден астам немере, шөбере және шөпшек сүйген қарт әжеге аудан әкімі Бақыт Асановтың, аудандық мәслихаттың хатшысы Қадір Сәрсекбаевтың және «Amanat» партиясының Мақтаарал аудандық филиалының төрағасы Досым Асабаевтың арнайы алғыс хаттары мен сый-сияпаттары табысталды.

Күтімі жақсы, қимылы ширақ кейуана аяқ асты келген қонақтарға өз ризашылғын білдіріп, іштегі шексіз қуанышын жасырмады. Өзінің ұзақ жылдар бойы өміріндегі жақсы да жаман естеліктерімен бөлісіп, ақыл-кеңестерін айтты. Сондай-ақ, ауданымыздың дамуына, халқымыздың ынтымақ-бірлігінің артуына тілектестік білдіріп, келген қонақтарға ақ батасын берді.

Айта кетейік, Лескүл Мәмбетова 1922 жылы 26 мамырда дүниеге келген. Қазіргі таңда батыр ана Мақтаарал ауданында жасы 100-ге жеткен екінші тұрғын саналады.

Мақтаарал ауданы әкімінің баспасөз қызметі