Көрме нәтижесінде 45 номинацияның жеңімпаздары анықталды.

ҚР Ауыл шаруашылығы министрлігінің ұйымдастыруымен Түркістан облысы Сарыағаш ауданында «Етті-май бағытындағы халықаралық асыл тұқымды қойлар» көрмесі өтті, деп хабарлайды.

Көрмеге Ресей, Молдова, Өзбекстан, Тәжікстан, Қырғызстан елдерінен келген 100-ден аса қой өсіруші азаматтар және еліміздің 8 облысынан келген шаруалар қатысты.

«Шара шеңберінде етті-майлы қой тұқымының «Ең ауыр салмақты», «Ең биігі» аталымдары бойынша байқаулар өтті. Соның нәтижесінде 45 номинацияның жеңімпаздары анықталды. Сонымен қатар ҚР Ауыл шаруашылығы министрлігінің Мал шаруашылығы департаменті басшысы Ерлан Ілиясов үздік шаруаларды «Ауыл шаруашылығы үздігі», «Үздік қой өсіруші шаруашылық» және «Үздік асылдандырушы» төсбелгілерімен марапаттады», — делінген Түркістан облысы әкімдігінің хабарламасында.

Сондай-ақ шараға қатысқан Сарыағаш ауданының әкімі Мұхит Отаршиев көрме барысында жергілікті шаруалар мол тәжірибе алмасатынына сенім білдірді.