Бұл үйлер тұрмысы төмен және көпбалалы отбасыларға, жетімдер мен әлеуметтік осал топтағы азаматтарға берілді. Жаңа үй иелерін  Парламент Сенатының депутаты Әли Бектаев пен Әлімжан Құртаев құттықтады. Сонымен қатар, қала әкімі Гүлжан Құрманбекова арнайы құттықтап, пәтер кілттерін табыс етті.

Берілген пәтерлер «Көктем-2»тұрғын ауданында орналасқан. 5 қабаттан тұратын 4 көпқабатты үйдің жалпы көлемі 12 308 шаршы метрді құрайды. 60 пәтерден тұратын әрбір ғимаратта: 1 бөлмелі – 15 пәтер, 2 бөлмелі – 15 пәтер, 3 бөлмелі – 30 пәтер бар.

Бүгінде Арыс қаласында көпбалалы және әлеуметтік аз қамтылған отбасыларды баспанамен қамтамасыз ету мәселесі шешімін тауып келеді. Мәселен, өткен жылы аталмыш тұрғын ауданынан «Нұрлы жер» бағдарламасы аясында салынған 36 пәтерлі 3 қабатты 3 тұрғын үй ел игілігіне берілсе, ағымдағы жылы «Қолғабыс» қайырымдылық қорының бастамасымен баспанаға мұқтаж 2 отбасыға арнап үй салынып, пайдалануға берілді. Алдағы жылдары бұл бағыттағы жұмыстар жалғасын тауып, тағы 8 баспана бой көтереді деген жоспар бар.