Шымкентте көкек әкелер көбейіп барады. Мемлекеттік және жеке сот орындаушылар жыл басынан бері 264 мыңнан астам атқару ісін орындау үдерісінде. Соның 72 мыңы аяқталды. Азаматтардың арыз-шағымы негізінен алимент төлеуден жалтарып жүрген көкек әкелерге қатысты болып отыр. Шымкенттегі Әділет департаментінде өткен мәжілісте осы жайы сөз болды.

 Алимент өндіру бойынша жыл басында 11 849 іс тіркелген. Соның аяқталғаны — 1 жарым мыңнан сәл ғана асады. Бауыр еті баласының алдындағы берешегі көбейіп, қарызға белшесінен батқан 3 борышкердің жылжымайтын мүлігі сатылымға шығарылды. Сөйтіп, 6 млн. теңге өндіруші тарап мүддесі үшін шешілді. Сала мамандары жұмыссыздық себебінен алимент төлеу алмай жүрген борышкерлерге арнап, «бос жұмыс орындары» жәрмеңкесін ұйымдастырған. Оған 10-ға жуық кәсіпорын қатысты. Нәтижесінде 47 көкек әке жұмыс іздеуші ретінде тіркеліп, соның 15-і екі қолға бір күрек тапқан. Сондай-ақ жиында еңбек жалақысын өндіре алмай жүрген жандардың мәселесі де әңгіме өзегіне айналды. Қазір сот орындаушылар қаруаында 168 құжат жатыр. Олардың жалпы сомасы 200 млн-нан асады.