Шымкентте байланыс және ақпарат қызметкерлерінің кәсіби мерекесі басталып кетті. Миилионды мекеннің сөз ұстағандары алғашқы күні аяқ доптан жарысқа шығып, спартакиаданың екінші күнінде арқан тартып, валейбол ойнады. Сала мамандары спорттың алты түрінен бақ сынамақ.

Жарыс болған жерде шын жүйріктердің шашасына шаң жұқтырмайтыны белгілі. Бұл  додада да дүлдүлдер дараланып шықты. Әсіресе, арқан тарту мен валейбол аламаны тартысқа толы болды. Топтық кезеңде тосылмай, ақтық айқасқа шыққан «Оңтүстік» командасы өзгелерден оқ бойы оза шапты.

Батыл жүректі жігіттер мен қыздардан құралған командалар арқан тартудан ойын көркін қыздырды. Арнамыздың Мақсұт Айтжанов бастаған білектілері тірескеннің тізесін жерге тигізіп тағы да бас жүлдені жеңіп алды.

Арқан тарту жарысына бас аяғы алты команда қатысты. Нәтижесінде жүлделі 1-орын «Оңтүстік» телеарнасы, 2-орын «Ернұр Пресс» корпорациясы, 3-орын «Рейтинг-собкор» командасы ие болды.

Спартакиада волейбол бәсекесiмен жалғасты. Жарысқа қатысуға бұл жолы 6 команда ниет бiлдiрген. Алғашқы бәсекеде телеарна тобы «Шымкент келбеті» газетінің ойыншыларына есе жіберіп алған болатын. Намысқа тырысқан тілшілер келесі айналымда  «Рейтинг собкор» жігеттерін ойсырата жеңді. Соның есебінен ақтық сында «Ернұр Пресс» ойыншыларымен сынға шығып, қарсыластарды  25-21 есебімен тізе бүктірді.

«Оңтүстік» қоржынында тағы да жүлде.  Ойын алаңында айрықша ойын өрнегін көрсеткен ұжым бірінші орынды қанжығаға байлады. «Ернұр пресстің» ойыншылары да осал емес екен. Екінші орынның тұғырынан көрінді. Ал, «Ақпараттық коммуникация орталығының АКО командасы үшінші орынды місе тұтты.  Алда әлі шахмат, үстел теннисі, бильярд және боулингтен бәсеке бар.