Қала келбеті тек сәнді де сәулетті үйлермен, жасыл желекті саябақтармен өлшенбейді. Күн сайын көркейіп келе жатқан Шымкенттің ажары оның тазалығына да байланысты. Шымкент республикадағы үшінші мегаполис екенін ескерсек, қаланың таза, әдемі әрі жасыл желекке оранып тұруы әрбір тұрғынның сүйіспеншілігі мен жанашырлығын қажет етеді. Сондықтан тазалық мәселесі алдыңғы орында болуы заңдылық.
Ауланы ретке келтіріп, ұқыпты ұстау санитарлық талап қана емес, мәдениет пен талғамның белгісі. Дей тұра, өз үйінің ішкі жинақылығымен ғана шектелетіндер бар. Себебі, қоқысты көшеге төгетін, үйдің жоғары қабатынан далаға лақтыратындар да кездеседі. Арнайы белгіленбеген орындарға қоқыс тастай салатындар да бар.
Осыған орай, шымкенттік полиция қызметкерлері қаланың сәулеттік келбетіне кері әсерін тигізіп, көше бойына қоқыс тастаған жайттарды анықтау мақсатында профилактикалық іс-шаралар жүргізіп жатыр.
Қаратау аудандық полиция басқармасы Жергілікті полиция қызметі бөлімінің учаскелік полиция инспекторлары Нұрсат шағынауданында Арғынбеков көшесінің бойында жүк көлігін байқап, тоқтатады. Жүк көлігінің доңғалақтары балшық, лас күйінде жолды лайлап, қалалар мен елдімекендерді аббаттандыру қағидаларын бұзғаны анықталды. Көлік жүргізушіге ҚР ӘҚБтҚ-нің 505-бабына сәйкес әкімшілік хаттама толтырылып, түсіндірме жұмыстары жүргізілді.
Қаланың тазалығына әрбір тұрғын жауапты. Тазалық өзіміздің үйімізден, ауламыздан, көшемізден басталатынын ұмытпайық!
Шымкент қаласы Полиция департаменті қаланың аббаттандыру қағидаларын бұзған азаматтар әкімшілік жауапкершілікке тартылатынын ескертеді!