САХНАДА ЖҮЗДЕН АСА БЕЙНЕ ЖАСАҒАН ШЫМКЕНТТІК АКТЕР

Актерлік өнер — тірі образ (кейіп) тудыру талантын және шабыт күшін қажет ететін ерекше қабілет. Шымкент қалалық өзбек драма театрының артисі, ҚР «Мәдениет қайраткері» Махмудов Сайдикарим 2003 жылдан бастап театр өнері саласында қызмет етеді.

Аталған жылы Елбасы Н.Назарбаевтың қатысуымен өзбек драма театрының ғимараты салтанатты түрде ашылып, ел игілігіне берілді. Бүгінде осы театрдың сахна саңлағына айналған Махмудов Сайдикарим өзі сомдаған образдарымен көрермен сүйіктісіне айналды.

Ол А.Жамалдың «Опасыз ақшалар» қойылымында — Ләтифжан, Й.Ладаның «Сиқырлы алмаларында» — командир, Д.Исабековтің «Ескерткішінде» – қожайын, Б.Брехттің «Құраж ана және оның балаларында» — Руханий, Ю.Нилдің «Талдар көлеңкесінде» — Симеон, С.Анвардың «Аспаннан түскен адам» қойылымында – Ергеш, С.Ахматың «Келіндер көтерілісі» комедиясында – Асқар, т.б. осы сынды бүгінгі күнге дейін жүзге тарта рөлдерді сомдаған.

Сахна өнеріндегі еңбегі нәтижесінде 2006 жылы «ҚР Мәдениет қайраткері» төсбелгісімен, 2013 жылы «Халықаралық театр күні» мерекесіне орай облыстық мәдениет басқармасының Алғыс хатымен, 2014 жылы «Қазақстан халқының бірлігін, қоғамдық келісіммен қазақстандық потриотизімді нығайтуға қосқан лайықты үлесі үшін» Қазақстан халқы Ассамблеясының Төрағасы Н.Назарбаевтың Құрмет грамотасымен, 2015 жылы ҚР «Қоғам жанкүйері» төс белгісімен, «ҚР Тәуелсіздігіне 25 жыл» мерекелік медалімен марапатталды.

Актер бүгінгі жас буынға шеберлігімен үлгі болып келеді.