ПОЛИЦЕЙЛЕРКАРАНТИН ТАЛАПТАРЫНЫҢ САҚТАЛУЫН ҚАТАҢ БАҚЫЛАУДА

Карантин талаптарының сақталуын қадағалау мақсатында, Түркістан облысында күнделікті тұрақты іс-шаралар жүргізілуде. Осы тұста Қазығұрт АПБ-нің қызметкерлері рейдтік жұмыстарын жүргізді. Ол үшін аудандағы тамақтану орындарына, сауда үйлеріне, азық-түлік дүкендерінде және адам көп шоғырланатын орындарда карантин талаптарының сақталуы қатаң бақылауға алынды.

Аталған шара барысында, адам көп жиналатын аймақтарда медициналық бетпердесіз жүрген 2 азамат анықталған. Олар заңнама талаптарын  бұзғаны үшін тиісті жауап береді. Сонымен қатар, карантин режимін бұзып, көпшілікті жинап, той жасаушылар да анықталды. Бірі 100-ден астам адамдарды жинап той жасаса, енді бірі 200-ге жуық туыстарын жинап, қыз ұзату тойын жасаған. Барлығына түсіндірме жұмыстары жүргізіліп, «Халықтың санитарлық-эпидемиологиялық салауаттылығы саласындағы заңнама талаптарын, сондай-ақ, гигиеналық нормативтерді бұзу» бойынша тиісті материалдар топталып, құжаттар заңды шешім қабылдау үшін Қазығұрт аудандық полиция бөлімшесіне жолданды. Қазығұрт  ауданы аумағында мобильдік топтар жыл басынан бері карантин талаптарын бұзудың 61 жайтын анықтаған. Оның ішінде 33 жайт медициналық бетпердесіз жүрген тұрғындарға қатысты заңбұзушылық. Сол себепті, Түркістан облысы Полиция департаментінің өкілдері бекітілген талаптарды орындамай, тұрғындардың денсаулығына қауіп төндіретін азаматтар тиісті жазаға тартылатынын ескертеді.