«ОҚУШЫЛАР АРАЛАС ФОРМАТТА ОҚИДЫ»,- деп хабарлайды «masa24.kz» ақпарат агенттігі

IV тоқсаныннан бастап шымкенттік оқушылар да аралас форматта оқиды. Тек шәкірттер саны әр сыныпта 25 -тен аспауы қажет. Ал сабақтан тыс уақытта білім беру әкімшілігінің шешіміне сәйкес 15 адамнан аспайтын топта жекелей оқытуға рұқсат етіледі. Ал, жоғарғы сынып оқушыларын аттестаттау 9-сыныптарда 28 мамыр – 7 маусым, ал 11-сыныптарда 1–10 маусым аралығында жүргізіледі. Бұдан бөлек ҰБТ –ге де өзгерістер енгізілген.

1-сыныпқа балаларды қабылдау 11 қадамнан тұратын нұсқама арқылы жүргізіледі. Құжаттар электронды форматта «Электрондық үкіметтің» веб порталы арқылы 1 сәуірден 1 тамызға дейін қабылданады. Жиында оқушыларға мектеп формасы міндеттелмейтіні мәлімделді. Яғни, оқушыларға білім ошағына еркін, ұқыпты және жинақы киімде баруға рұқсат беріліп отыр.

Биыл Ұлттық бірыңғай тестілеу бойынша талапкерлерге 4 мүмкіндік беріліп отыр. Ақылы тестілеудің біріншісі қаңтар айында өтті. Ал екіншісі 10 наурыз бен 10 сәуір аралығында өтіп жатыр. Осы орайда үміткер ақысыз грантқа түсу мүмкіндігі бойынша сәуірдің 11-і мен маусымның 30-ы аралығында 2 рет өз бағын сынай алады. Ол үшін оқушы тест тапсыратын орынды, күнді және уақытты өз қалауы бойынша таңдайды.

Жиын соңында басқарма басшысы Жанат Тәжиева ата-аналар тарапынан қойылатын бірқатар сұрақтарға жауап берді. 4 тоқсаннан бастап аз қамтылған отбасынан шыққан балаларға бір мезгіл тегін тамақ берілетіні айтылды. Сондай-ақ, ата-аналар балаларының дәстүрлі форматта оқығанын қаламаса, өтініш жазып, онлайн білім алуына болатынын мәлімдеді.