Шымкент Creative Hub алаңында дәстүрлі ұлттық нақыш пен заманауи дизайнды ұштастырған авторлық тұмар жасау бойынша шеберлік сағаты өтті.

Іс-шара барысында қатысушылар ағаш, акрил бояуы, тастар және эпоксидті шайырды пайдаланып, өз қолдарымен ерекше әшекей бұйымдар жасады. Шеберлік сағатын суретші, зергерлік бұйымдар дизайнымен айналысатын Айман Тельходжаева өткізді.

Қатысушылар арнайы дайындықсыз-ақ ұлттық ою-өрнек пен түрлі символдарды қолдана отырып, жеке дизайнын әзірледі. Нәтижесінде әрқайсысы бірегей алқа-тұмар жасап шықты.

Шеберлік сағатының мақсаты – ұлттық мәдени мұраны заманауи қолөнермен сабақтастырып, қала тұрғындарының шығармашылық қабілетін дамыту.

Айта кетейік, Shymkent Creative Hub-та керамика, пэчворк, дизайн және қолөнер бағыттары бойынша тұрақты түрде шеберлік сабақтары мен оқыту бағдарламалары ұйымдастырылады.