Қоғамның тыныштығы мен қауіпсіздігі – баршамызға ортақ құндылық. Заң мен тәртіп сақталған жерде адамдардың да өзіне деген сенімі артып, өмір сүруге қолайлы орта қалыптасады. Сондықтан құқық бұзушылықтың алдын алу тек құқық қорғау органдарының міндеті емес, әр азаматтың жауапкершілігі деп ойлаймын. Бүгінде әсіресе жасөспірімдер арасындағы қауіпсіздік мәселесіне ерекше мән берген жөн. Соның бірі – кәмелетке толмағандардың көлік құралын басқаруы. Көлік жүргізу – үлкен жауапкершілікті талап ететін іс. Жол қозғалысы ережесін білмеу немесе оны сақтамау адамның өз өміріне ғана емес, айналасындағы адамдардың қауіпсіздігіне де қауіп төндіруі мүмкін.
Сондықтан ата-аналар балаларына көлік құралын басқарудың жауапкершілігін түсіндіріп, жол ережесін сақтаудың маңызын үнемі айтып отырғаны дұрыс. «Бала ғой, үйреніп жүр» деп қарауға болмайды. Бір сәттік немқұрайлылықтың соңы орны толмас өкінішке әкелуі мүмкін. Әр ата-ана баласының қайда жүргеніне, кіммен араласатынына және бос уақытын қалай өткізетініне көңіл бөлуі қажет.
Жасөспірімдер арасында алдын алуды қажет ететін тағы бір маңызды мәселе – есірткі мен зиянды заттардың таралуына жол бермеу. Нашақорлық – адамның өзіне ғана емес, оның отбасына және тұтас қоғамға кері әсер ететін үлкен қауіп. Әсіресе жастардың түрлі күмәнді ұсыныстарға еріп кетпеуі маңызды. Жасөспірімдерге «қызығушылық үшін байқап көру», «бір реттен ештеңе болмайды» деген жалған түсініктерге сенбеу керектігін түсіндіруіміз қажет. Күмәнді заттар мен ұсыныстардан аулақ болып, бейтаныс адамдардың күмәнді әрекеттеріне араласпау – қауіпсіздіктің қарапайым қағидаларының бірі. Бұл ретте бала тәрбиесінде отбасының рөлі ерекше. Балаға тек тыйым салу жеткіліксіз. Онымен ашық сөйлесіп, дұрыс пен бұрысты ажырата білуге, қиын жағдайда кімнен көмек сұрау керектігін білуге үйрету маңызды. Құқық бұзушылықтың алдын алу – күнделікті өмірдегі қарапайым тәртіптен басталады. Жол қозғалысы ережесін сақтау, қоғамдық орында тәртіп бұзбау, бөтеннің мүлкіне қол сұқпау, жанжалға араласпау, күмәнді ортадан аулақ болу – осының барлығы заңға құрметтің көрінісі. Меніңше, қауіпсіз қоғам құру үшін «бұл біреудің мәселесі» деп сырт айналмай, әрқайсымыз өз жауапкершілігімізді сезінуіміз керек. Бір-бірімізге ескерту жасап, жастарға дұрыс бағыт көрсетіп, құқық бұзушылықтың алдын алуға бірге атсалыссақ, нәтижесі де жақсы болады. Сауран ауданының тұрғындарын заң талаптарын сақтауға, жол қауіпсіздігіне жауапкершілікпен қарауға, жасөспірімдерге көлік басқаруға жол бермеуге және жастарды зиянды әдеттерден қорғауға шақырамын. Заңды құрметтеу – өзіңді және өзгелерді құрметтеу. Қауіпсіздік пен тәртіп әрқайсымыздан басталады.
БЕРДАЛЫ БАЙМУРАТОВ
САУРАН АУДАНДЫҚ АРДАГЕРЛЕР КЕҢЕСІНІҢ ТӨРАҒАСЫ
