Құрметті аудан тұрғындары!
Алда өтетін Құрылтай сайлауы — еліміздің қоғамдық-саяси өміріндегі маңызды әрі жауапты кезеңдердің бірі. Бұл — мемлекетіміздің тұрақты дамуына серпін беріп, ел бірлігі мен қоғамдық келісімді нығайтуға, халықтың ортақ мүддесін айқындайтын маңызды бастамаларды қолдауға мүмкіндік беретін маңызды саяси науқан.
Әрбір азаматтың қоғам өміріне белсенді араласып, ел тағдырына бейжай қарамауы — Тәуелсіз Қазақстанның жарқын болашағының кепілі. Сондықтан Құрылтай сайлауына қатысу — әр адамның азаматтық парызы ғана емес, келешек ұрпақ алдындағы жауапкершілігін айқындайтын маңызды қадам.
Бүгінде елімізде жүзеге асырылып жатқан реформалардың негізгі мақсаты — әділетті қоғам қалыптастыру, халықтың пікіріне сүйенетін тиімді мемлекеттік басқару жүйесін жетілдіру. Осы игі мақсаттардың орындалуы қоғамның белсенділігі мен бірлігіне тікелей байланысты. Құрылтай сайлауы — ел дамуына қатысты өзекті мәселелерді ортаға салып, халықтың ұсыныстары мен бастамаларын бір арнаға тоғыстыратын маңызды алаң.
Қоғамдағы тұрақтылық пен ұлттық құндылықтарды сақтау жолында аналардың атқаратын рөлі ерекше. Отбасындағы тәлім-тәрбие, ұрпақ санасына отансүйгіштік пен адамгершілік қасиеттерді сіңіру, бірлік пен татулықты дәріптеу — ең алдымен аналардың өнегелі ісімен қалыптасады. Сондықтан ақ жаулықты аналарымыздың, ардақты әжелеріміздің, қыз-келіншектеріміздің және барша аудан тұрғындарының Құрылтай сайлауына белсенді қатысуы ел болашағына деген жанашырлықтың нақты көрінісі болмақ.
Еліміздің ертеңіне қатысты маңызды шешімдер қабылданатын сәтте әрбір дауыс — мемлекетіміздің өсіп-өркендеуіне қосылған үлес. Бірлігімізді бекемдеп, елдік мүддені бәрінен биік қоя отырып, маңызды саяси науқанға белсенді қатысып, азаматтық ұстанымымызды бірге танытайық.
Гүлнар Өстемірқызы,
Сауран ауданының тұрғыны