Шымкент қаласының Еңбек мобильділігі орталығына қарасты Әл-Фараби ауданы мансап орталығы аудандық прокуратурамен бірлесіп, «Оңтүстік» арнайы экономикалық аймағында алимент бойынша берешегі бар азаматтарға арналған бос жұмыс орындары жәрмеңкесін ұйымдастырды.

Жәрмеңкеге индустриялық аймақтарда орналасқан бірқатар өндіріс орындары қатысып, жұмыс іздеушілерге өздеріндегі бос жұмыс орындарын ұсынды. Атап айтқанда, «Arnatex», «Назар Текстиль», «Бал Текстиль», «Балаби Текстиль», «MARVIK PARTNERS» және Шымкент химия компаниялары 65 бос жұмыс орындарын таныстырды.

Әрбір кәсіпорын өкілдері қажетті мамандықтар, еңбекақы мөлшері, қызметкерлерді тасымалдау, әлеуметтік пакет және жұмыс кестесі туралы толық ақпарат берді.

Әл-Фараби ауданы мансап орталығының басшысы Нұрбол Шымкентбаев жұмыс іздеушілерге жұмыспен қамту шараларына қатысу тетіктері мен Enbek.kz электронды порталының мүмкіндіктерін түсіндірді.

Іс-шара аясында қатысушылар «Назар Текстиль» кілем фабрикасына барып, өндіріс орнындағы жұмыс жағдайымен және бос орындармен танысты.

– Қазіргі таңда Әл-Фараби ауданында алимент бойынша берешегі бар 450 борышкер тіркелген. Олардың жалпы қарызы 9 миллион теңгеден асады. Соның ішінде 270 азамат жұмыссыз. Бүгінгі жәрмеңкеге борышкерлердің шамамен 30 пайызы қатысты. «Заң және тәртіп» қағидаты аясында ұйымдастырылған бұл жәрмеңкенің ерекшелігі – қатысушылар жұмыс орындарымен танысып қана қоймай, өндіріс орындарын аралап, қызметкерлерге жасалған жағдайды өз көздерімен көрді, – деді Әл-Фараби ауданы прокурорының орынбасары Сабит Төлепбергенұлы.