Қала тұрғындарының қауіпсіздігі мен жайлылығы – әрқашан басты назарда. Осы мақсатта Еңбекші ауданының әкімі Досбол Есілбек ауданның тыныс-тіршілігімен жақынырақ танысып, түнгі уақыттағы жағдайды бақылау үшін бірқатар аумақтарға кешкі рейд ұйымдастырды. Аталған шараға аудан әкімдігіне қарасты жауапты сала мамандары мен коммуналдық қызмет өкілдері де қатысты.
Түнгі аралау жұмыстары барысында аудан басшысы 11-12-шағынаудандарды және Жібек жолы мен Сайрам көшелерінің қиылысындағы гүлзар аумақтарын аралап шықты. Бұл аймақтар – халықтың жиі жүретін, сондай-ақ, қауіпсіздік пен тазалықты қажет ететін орындардың қатарында.
Аралау кезінде келесі маңызды бағыттар ерекше назарға алынды:
• Көшелердің санитарлық тазалығы:
Қоғамдық орындар мен жаяу жүргіншілер жолдарының тазалығы тек күндізгі уақытта ғана емес, түнгі мезгілде де тиісті деңгейде болуы қажет. Осыған байланысты, тазалыққа жауапты мекемелердің жұмысы тексеріліп, тазаланбаған аумақтар бойынша ескертулер жасалды.
• Түнгі жарықтандыру жүйесінің жағдайы:
Аудан тұрғындарының қауіпсіздігін қамтамасыз етуде түнгі жарықтандырудың рөлі зор. Көшелерде, аулалар мен жаяу жүргіншілер өткелдерінде жарық шамдарының дұрыс жұмыс істеуі тексерілді. Анықталған ақауларды жою бойынша нақты тапсырмалар берілді.
• Балалар ойын алаңшаларының техникалық және санитарлық жағдайы:
Балаларға арналған ойын алаңдарының қауіпсіздігі мен тазалығы – басты назарда. Кейбір ойын алаңдарында тозған элементтер мен сынған құрылғылар анықталып, оларды ауыстыру немесе жөндеу жөнінде жауапты мамандарға тапсырмалар жүктелді.
• Қазылған, бұзылған жолдарды қалпына келтіру жұмыстары:
Инфрақұрылымдық жөндеу жұмыстарынан кейін жол жабындыларының дер кезінде қалпына келтірілуі – тұрғындардың жайлылығы мен көлік қозғалысы үшін маңызды. Кейбір учаскелерде асфальттау жұмыстарының кешіктірілгені белгілі болып, мердігер ұйымдарға шара көру тапсырылды.
• Заңсыз құрылыс пен рұқсатсыз сауда нысандары:
Аудан аумағында рұқсатсыз орнатылған құрылыс нысандары мен көшелерде жүргізіліп жатқан бейберекет сауда әрекеттері тіркелді. Бұл жағдайлар бойынша заң аясында тиісті шаралар қолдану тапсырылды.
• Құрылыс жұмыстарының барысы:
Аудан аумағында салынып жатқан тұрғын үйлер мен әлеуметтік нысандардың құрылыс сапасы мен мерзіміне ерекше мән берілді. Құрылыс алаңдарында қауіпсіздік талаптарының сақталуы, құрылыс материалдарының қорғалуы және жұмыстың белгіленген кестеге сай жүруі қатаң қадағалауға алынды.
Аралау қорытындысы бойынша аудан әкімі анықталған барлық кемшіліктер бойынша жауапты бөлім басшыларына нақты тапсырмалар жүктеп, олардың орындалу мерзімін белгіледі. Тиісті шаралардың жүзеге асуы мен бақылау процесі аудан әкімдігінің күн тәртібінен түспейді.
Мұндай түнгі аралау жұмыстары алдағы уақытта да өз жалғасын табатын болады. Бұл – тексеру емес, ең алдымен тұрғындардың жайлы өмір сүруіне жағдай жасауға бағытталған бастама екенін атап өткен жөн.
