Халықпен ашық диалог құру және тұрғындардың өзекті мәселелерін шешу мақсатында Еңбекші ауданы әкімдігінің ұйымдастыруымен аудан аумағын аралау жұмыстары тұрақты түрде жүргізілуде. Бүгін аудан әкімі Досбол Есілбек, аудандық полиция басқармасының бастығы Жандос Бейсенов және жауапты сала қызметкерлері бірлесіп, Жұлдыз, Жалын және Қарабастау (жаңақұрылыс аумағы) тұрғын алаптарына арнайы барып, жергілікті тұрғындармен кездесті.
Аралау барысында аудан басшысы әрбір тұрғын алаптағы өзекті мәселелерге назар аударып, тұрғындармен бетпе-бет кездесу арқылы олардың ұсыныс-пікірлерін тыңдады.
Кездесу өте ашық, нақты және іскерлік сипатта өтті.
Тұрғындар көтерген негізгі мәселелер:
— Санитарлық тазалықтың жеткіліксіздігі (қоқыс шығару, көше сыпыру жұмыстарының ретсіздігі);
— Көше жарығының әлсіздігі немесе мүлде болмауы (қазіргі таңда кейбір көшелер қараңғы, бұл қауіпсіздікке кері әсер етуде);
— Жол инфрақұрылымы, атап айтқанда асфальт төсеу қажеттілігі, әсіресе жаңадан құрылған тұрғын аймақтарда;
— Жол белгілерінің болмауы немесе ескіріп, көрінбей қалған жағдайлар (балалар ойнайтын аумақтарда “Абайлаңыз, балалар!” белгілері жетіспейді).
Бұл мәселелер аудан әкімінің тікелей бақылауымен қаралып, жауапты сала мамандарына нақты тапсырмалар жүктелді. Әрбір мәселе бойынша мерзімді іс-шаралар жоспары жасалып, техникалық мүмкіндіктер мен қаржыландыру көлемі есепке алына отырып, заң талаптары аясында шешу жолдары қарастырылуда.
Кездесуге қатысқан аудандық полиция басқармасының бастығы Жандос Бейсенов тұрғындармен қауіпсіздік мәселелері бойынша түсіндіру жұмыстарын жүргізді. Ол:
— Қоғамдық тәртіпті сақтау;
— Жол қозғалысы ережелерін бұзбау;
— Интернет алаяқтықтың алдын алу;
— Кәмелетке толмағандардың қатысуымен орын алатын құқық бұзушылықтарды болдырмау;
— Түнгі уақытта тәртіпті сақтау мәселелеріне ерекше көңіл бөліп, тұрғындарға кеңес берді.
Сондай-ақ, полиция қызметкерлері азаматтарды өз учаскелік инспекторларын тануға, кез келген құқықбұзушылық туралы дер кезінде хабар беруге, төтенше жағдайлар кезінде 102 қызметіне жүгінуге шақырды. Интернет алаяқтықтың күрт көбеюіне байланысты алдын алу шаралары туралы жаднамалар таратылып, сақтық шаралары түсіндірілді.
Аудан әкімі Досбол Есілбек тұрғындарға алғыс айтып, алдағы уақытта мұндай кездесулер мен аралау жұмыстары барлық тұрғын алаптарда жүйелі түрде жалғасатынын жеткізді. Әкім халықтың мұң-мұқтажын тікелей естіп, әр мәселені дер кезінде шешу — жергілікті атқарушы органдардың басты міндеті екенін баса айтты.
Құрметті тұрғындар!
Егер сіздің де тұрғын алабыңызда өзекті мәселелер болса немесе ұсыныс-пікірлеріңіз бар болса, оларды аудан әкімдігіне немесе учаскелік инспекторға жеткізуден тартынбаңыз. Біздің басты мақсатымыз – Сіздермен бірге қауіпсіз, таза және жайлы орта қалыптастыру.
