Қоршаған ортаны қорғау, елді мекендерді абаттандыру және санитарлық тазалықты сақтау мақсатында аудан аумағында сенбілік жұмыстары жалғасуда. Бұл игі шара аясында аудан көлемінде кешенді түрде абаттандыру мен тазалық жұмыстары ұйымдастырылып, тұрғындардың белсенді қатысуымен қарқынды түрде жүзеге асуда. Аталған сенбілік – тек маусымдық емес, бүкіл жыл бойы санитарлық тәртіп пен экологиялық мәдениетті арттыруға бағытталған маңызды бастама болып табылады.
Сенбілік барысында көшелер мен аулалар жуылып, жол жиектеріндегі қоқыстар жиналды, көптен бері жиналмай жатқан тұрмыстық қалдықтар мен өздігінен өскен шөптер орылып, қураған ағаш бұталары қырқылып, каналдар мен арық-атыздар тазарды. Сонымен қатар, көгалдандыру жұмыстары қолға алынып, жасыл аймақтар ретке келтірілді. Бұдан бөлек, гүлзарлар мен саябақ аумақтары көркейтіліп, ағаш көшеттері отырғызылды. Мұндай шаралар – тек тазалыққа ғана емес, экологиялық қауіпсіздікке де оң әсерін тигізеді.
Ортақ іске Аудан әкімінің аппараты, «Еңбекші» коммуналдық мемлекеттік мекемесі, «Группа Интеко» жауапкершілігі шектеулі серіктестігі мен өзге де ұйымдар, сондай-ақ аудан тұрғындары белсенді түрде атсалысты. Қызметкерлер мен еріктілер бірігіп, сенбілікке жұмыла кірісіп, әр мекеме өз аумағында тазалық жұмыстарын жүргізіп, қоршаған ортаның көркеюіне үлес қосты. Бұл ретте тұрғындардың өз еркімен, ынтамен атсалысуы — қоғамда экологиялық мәдениеттің қалыптасып келе жатқанын білдіреді.
Жалпы алғанда, мұндай сенбілік іс-шаралары ауданның санитарлық жағдайын жақсартуға ғана емес, тұрғындардың бірлік пен ұйымшылдық танытуына, өз ортасына деген сүйіспеншілігін арттыруға да септігін тигізеді. Ауыл мен қала келбеті тек мемлекеттік мекемелердің емес, барша азаматтардың ортақ жауапкершілігі екенін ұмытпаған жөн.
Қадірлі тұрғындар! Таза әрі жайлы өмір сүру ортасын қалыптастыру – әрқайсымыздың азаматтық міндетіміз. Ауламызды, көшемізді, ауданымызды таза ұстау – өзімізге де, келешек ұрпаққа да үлкен пайда әкеледі. Сондықтан барлығымыз бірлесе отырып, туған өлкеміздің тазалығын сақтау ісіне үлес қосайық. Жыл он екі ай бойы тазалықты ұстанып, өз ортамызға жанашырлықпен қарайық!
