Шымкент қаласындағы көп жылдан бері тұрғындарға қызмет етіп келе жатқан Назым апа базары енді заман талабына сай жаңартылмақ. Бүгінде аталған сауда орнында сауда нүктелерін демонтаждау жұмыстары жүргізілуде.
Бұл жұмыстар — Қазақстан Республикасы Сауда және интеграция министрлігімен бірлесіп әзірленген базарларды жаңғырту жөніндегі Жол картасына сәйкес жүзеге асырылуда.
Базар аумағында атқарылып жатқан жұмыстармен Шымкент қалалық кәсіпкерлік және индустриалды-инновациялық даму басқармасының басшысы арнайы барып танысып, бақылап қайтты.
Жаңғырту жұмыстарының толық аяқталу мерзімі — 2025 жылдың желтоқсан айының соңы деп жоспарланған.
Жоба аясында базар аумағында санитарлық талаптарға, өрт қауіпсіздігі мен заманауи сауда стандарттарына сай келетін жаңа сауда орындары, инженерлік инфрақұрылым және жайлы жағдайлар қарастырылатын болады.
Мақсат – кәсіпкерлерге қолайлы орта қалыптастыру және қала тұрғындарына қауіпсіз, ыңғайлы, әрі мәдениетті сауда алаңын ұсыну.
