Шымкент қаласында «Таза Қазақстан» республикалық экологиялық акциясы жүйелі түрде жалғасуда. Бұл жоба – Мемлекет басшысы Қасым-Жомарт Тоқаевтың бастамасымен қолға алынған, тек белгілі бір маусымға ғана емес, жыл бойына атқарылатын маңызды шара. Акцияның басты мақсаты – қаланың экологиялық ахуалын жақсарту, тұрғындар арасында тазалық мәдениетін қалыптастыру және қоршаған ортаға деген қамқорлықты арттыру.
Шымкенттің барлық аудандарында, соның ішінде Еңбекші ауданында да бұл акция белсенді түрде өткізіліп жатыр. Еңбекші ауданының тұрғындары мен коммуналдық қызметкерлері бірігіп, Түркістан көшесінің бойындағы аумақты арнайы техниканың көмегімен толық тазарту жұмыстарын жүргізді. Жиналып қалған қураған шөптер, күл-қоқыс, түрлі тұрмыстық қалдықтар түгелдей жойылып, көше көрінісі жаңарды. Сонымен қатар, көше бойындағы ағаш және бұтақтардың өскен өсінділері кесіліп, ретке келтірілді, бұл көше мен айналасын көріктендіруге үлкен септігін тигізді.
Аудан әкімдігі назарын тек қана көшелердің тазалығына ғана емес, сонымен қатар тұрғындардың демалыс орнына айналған балалар ойын алаңшаларының жай-күйіне де аударды. Жергілікті мамандар сынған әткеншектер мен ойын құралдарын жөндеп, оларды жаңа бояумен сырлады. Бұл балалардың қауіпсіз әрі көңілді уақыт өткізуіне ықпал етті.
– Тазалық – бұл баршамыздың ортақ міндетіміз. Бүгінгі акцияға аудан тұрғындары, коммуналдық қызметтер мен әкімдік қызметкерлері белсенді қатысып, 10-нан астам арнайы техника жұмылдырылды. Бір күннің ішінде атқарылған жұмыс өте ауқымды болды, – дейді Еңбекші ауданы әкімі аппаратының бас инспекторы Қуаныш Айдапкелов. – Бұл бағыттағы жұмыстар алдағы уақытта да жүйелі түрде жалғасып, аудандағы экологиялық ахуал жақсарып, тұрғындардың өмір сүру сапасы артатынына сенімдіміз.
Осылайша, «Таза Қазақстан» акциясы аясында өткізілген тазалық жұмыстары – бұл тек сыртқы көріністі жақсарту ғана емес, сонымен бірге тұрғындар арасында экологиялық сана мен азаматтық жауапкершілікті арттыруға бағытталған маңызды қадам. Тазалық пен тәртіптің сақталуы – әрбір азаматтың борышы, ал тұрғындардың белсенділігі мен билікпен тығыз байланысы қала мәдениетін одан әрі биік деңгейге көтереді.
Еңбекші ауданындағы бұл шаралар – экологиялық тұрақтылық пен қоғамның дамуына үлкен үлес қосып, қаланың жалпы көркін жақсартуға бағытталған жүйелі жұмыстың бір бөлшегі болып табылады. Таза және жайлы қала – барлығымыздың ортақ міндетіміз және мақтанышымыз.