Шымкент қаласында тұрғындардың өтініштері мен ұсыныстары негізінде қоғамдық кеңістіктерді қайта жаңарту және балалар мен жастарға қолайлы орта қалыптастыру бағытындағы жұмыстар жүйелі түрде жалғасуда. Бұл – Мемлекет басшысы Қасым-Жомарт Тоқаевтың «Халық үніне құлақ асатын мемлекет» тұжырымдамасына сай атқарылып жатқан нақты шаралардың бірі.
Жуырда қала әкімі Ғабит Сыздықбековтің Жалын тұрғын алабындағы халықпен өткізген көшпелі кездесуі кезінде Көкжиде көшесіне балалар алаңын салу жөнінде ұсыныс айтылды. Тұрғындардың бұл орынды өтініші жедел түрде қаралып, іске асыру тетіктері қолға алынды.
Аталған аумақта бұрын қараусыз қалған, құрылыс нормаларына сәйкес келмейтін және заңсыз салынған құрылыс нысаны орналасқан еді. Бұл нысан балалар мен тұрғындарға қауіп төндіруі мүмкін болғандықтан, әкімдік шешімімен бұзылды. Оның орнына балаларға арналған жаңа ойын және воркаут алаңдары салынды.
Жаңа алаңша барлық қауіпсіздік талаптарына сай жабдықталып, балалар үшін тартымды әрі ыңғайлы ортаға айналды. Мұнда заманауи ойын құралдары мен спорттық жабдықтар орнатылған. Сонымен қатар, алаңның айналасы абаттандырылып, балалар мен олардың ата-аналары үшін жайлы демалыс аймағы құрылды. Бұл жоба тұрғындардың әлеуметтік сұраныстарын ескеріп, қаланың өмір сүру ортасын жақсартуға бағытталған маңызды қадам болды.
Қазіргі уақытта жаңа алаңша тұрғындардың игілігіне беріліп, балалардың бос уақытын тиімді әрі қауіпсіз өткізуіне мүмкіндік туғызуда. Бұл – жастар мен балалардың салауатты өмір салтын ұстануына және белсенді демалысқа деген қызығушылығын арттыруға септігін тигізеді.
Қала әкімдігі қоғамдық кеңістіктерді абаттандыру және тұрғындардың ұсыныстарын ескере отырып, заңсыз нысандарды жүйелі түрде ретке келтіру жұмыстарын алдағы уақытта да жалғастыруды жоспарлап отыр. Тұрғындармен тығыз байланыс орнату, олардың ұсыныстарын тыңдау және нақты нәтиже көрсету – әкімдіктің басты басымдығы болып қала береді.
Сонымен қатар, қала билігі балалар алаңшаларының қауіпсіздігін тұрақты түрде қадағалап, қажетті техникалық қызмет көрсетулерді уақтылы жүргізуді көздейді. Бұл – болашақ ұрпақтың амандығы мен денсаулығын қамтамасыз етудің маңызды факторы.
Аталған шаралар Шымкенттің тұрғындары үшін жайлы, қауіпсіз және тартымды қоғамдық ортаны қалыптастыруға бағытталған. Қала әкімі мен әкімдік қызметкерлері тұрғындардың ұсыныстарын тыңдап, қала дамуы мен инфрақұрылымын жетілдіруде ашықтық пен халықпен тығыз өзара әрекеттесуді сақтауға ұмтылуда.