2024 жылы Шымкент қаласындағы “Оңтүстік” арнайы экономикалық аймағында үш ірі жаңа өндіріс орны іске қосылды. Бұл жобалар өңірдің өнеркәсіптік әлеуетін арттыруда, жаңа жұмыс орындарын ашуда және импортты алмастыруда маңызды рөл атқаруда.
Салтанатты ашылу рәсіміне қала әкімі Ғабит Сыздықбеков қатысып, әр жобаның әлеуметтік-экономикалық маңызын атап өтті.
«Dapter-Line» ЖШС мектеп дәптерлері мен жазу қағаздарын өндіруге бағытталған. Жалпы инвестиция көлемі – 500 миллион теңге. Кәсіпорын 40 адамды жұмыспен қамтып отыр. Фабриканың жылдық қуаттылығы – 70 миллион дана дәптер.
«Balabi Textile» ЖШС шұлық өнімдерін өндірумен айналысады. Жобаның жалпы инвестициясы – 6,5 миллиард теңге. Өндірісте 500 жұмыс орны құрылған. Зауыт жылына 24 миллион жұп шұлық шығаруға қауқарлы.
«Nappa.kz» ЖШС аяқ киім өндірісіне маманданған. Жобаға 400 миллион теңге инвестиция тартылып, 60 жұмыс орны ашылды. Фабриканың жылдық өндірістік қуаттылығы – 200 мың жұп аяқ киім.
Барлық кәсіпорындардың құрылыс-монтаж жұмыстары толық аяқталып, заманауи өндірістік жабдықтар орнатылды. Бұл жобалар Шымкенттің экономикалық өсуіне елеулі үлес қосып, отандық өнім көлемін арттыруға мүмкіндік берді.
Алдағы уақытта да инвесторлар үшін қолайлы жағдай жасау және өндірістік инфрақұрылымды дамыту бағытындағы жұмыстар жалғасын табады.



