24 қазан күні Шымкентте «Жайлы мектеп» ұлттық жобасы аясында алғашқы екі мектептің техникалық ашылуы өтті. «Нұршуақ» шағынауданында орналасқан 2000 орындық жаңа мектепке 1130 оқушы қабылданды, ал «Қарабастау» тұрғын алабындағы 1200 орындық мектепте 950 бала білім алып жатыр. Бұл жаңа мектептерде оқу жылының екінші тоқсанынан бастап сабақтар басталды.
Мектептерде бастауыш және жоғары сынып оқушылары үшін жеке блоктар қарастырылып, балалардың дамуы мен оқуына қолайлы орта жасалған. Ерекше қажеттіліктері бар оқушылар үшін кедергісіз орта ұйымдастырылып, мектептер заманауи пән кабинеттерімен, STEM-зертханаларымен және робототехника сыныптарымен жабдықталған.
Сондай ақ Нұршуақ шағын ауданында орналасқан Мектептің материалдық базасы да жоғары деңгейде: 450 орындық акт залы, 444 оқушыға арналған асхана жұмыс істейді, жалпы 80 оқу кабинеті бар. Мектепке №54, №55 және №136 мектептерінен 1096 оқушы және 79 мұғалім ауысып келді. Оқушылардың қауіпсіздігін қамтамасыз ету мақсатында бейнебақылау камералары мен турникеттер орнатылған.