Түркістан қаласында «Белсенді ұзақ өмір сүру орталығының» ұйымдастыруымен салт-дәстүр мен ұлттық құндылықтарды дәріптейтін «Ел ұйытқысы – ене мен келін» сайысы өтті. Шараға Түркістан, Кентау, Арыс қалалары мен Созақ ауданынан келген 6 отбасы қатысты. Жиында Түркістан облыстық ақсақалдар алқасының төрағасы Жарылқасын Әзіретбергенов пен қалалық ардагерлер кеңесінің төрағасы Жарқынбек Құлмайымбетов сөз алып, сайыстың маңыздылығына тоқталды.

Шара — еліміздегі әрбір шаңырақтың тату-тәтті, үлгілі болуын насихаттап, ене мен келін арасындағы ауызбіршілікті сақтау мақсатында ұйымдастырылған. Қатысушылар ұмыт болып бара жатқан Құрсақ тойы, Қазанжарыс, Тымаққа салу, Қырқынан шығару, Тұмар, Айдар секілді салт-дәстүрге негізделген көріністерді сахналады. Одан бөлек, сөз шеберліктерін танытып, мақал-мәтел айтудан жарысқа түсті. Қолөнерден де отбасылар бағын сынады.

Нәтижесінде Созақ ауданынан келген отбасы жүлделі 1-орынды жеңіп алды. Арыс қаласынан келген отбасы 2-орынға, Түркістан қаласынан қатысқан отбасы 3-орынға ие болды. Ал, Кентау қаласынын келген отбасы «Көрермен көзайымы» номинациясын иеленді.

Түркістан облысының Өңірлік коммуникация қызметі